Në Qendrën e Numërimit dhe Rezultateve po vazhdon procesi i rinumërimit të fletëvotimeve për vendvotimet për të cilat Komisioni Qendror i Zgjedhjeve (KQZ) ka marrë vendim të posaçëm.
Sipas njoftimit të KQZ-së, deri më tani janë rinumëruar mbi 77 për qind e votave, konkretisht 1 mijë e 973 nga gjithsej 2 mijë e 557 vendvotime të përfshira në këtë proces. Rinumërimi po zhvillohet sipas listës së miratuar të vendvotimeve dhe nën mbikëqyrjen e organeve përkatëse.
KQZ-ja bën të ditur se procesi i rinumërimit është përmbyllur plotësisht në 28 komuna, ndërsa puna po vazhdon në komunat e tjera deri në finalizimin e plotë të procedurës.
Autoritetet zgjedhore kanë theksuar se rinumërimi po zhvillohet në përputhje me ligjin dhe me qëllim të garantimit të transparencës dhe integritetit të procesit zgjedhor.
