Ministrja në detyrë e Arsimit, Arbërie Nagavci, ka bërë të ditur nisjen e procesit të rishikimit të kurrikulave lëndore dhe programeve mësimore për arsimin fillor dhe arsimin e mesëm të ulët në Kosovë.
Përmes një njoftimi publik, Nagavci ka theksuar se rishikimi do të përfshijë klasat 1 deri në 5, si dhe klasat 6 deri në 9, me synim përditësimin dhe modernizimin e përmbajtjeve mësimore në përputhje me Kornizën Kurrikulare dhe kurrikulat bërthamë.
Sipas saj, ky proces ka për qëllim ngritjen e rezultateve të nxënësve, zhvillimin e kompetencave dhe shkathtësive të tyre, si dhe përshtatjen e arsimit me nevojat bashkëkohore. Ministrja ka vlerësuar se rishikimi i kurrikulave është thelbësor për rritjen e cilësisë, koherencës dhe harmonizimit të tyre me dokumentet strategjike të arsimit.
Nagavci ka shtuar se procesi do të krijojë kushte edhe për zhvillimin dhe ofrimin e teksteve shkollore cilësore, si dhe burimeve të tjera mësimore që mbështesin procesin e të nxënit. Sipas saj, kjo do të ndikojë edhe në lehtësimin e ngarkesës së nxënësve dhe zvogëlimin e peshës së çantave shkollore.
Ministrja në detyrë ka theksuar se Ministria e Arsimit mbetet e përkushtuar në avancimin e cilësisë së arsimit përmes politikave të qëndrueshme, zhvillimit të kurrikulave bashkëkohore dhe sigurimit të teksteve shkollore cilësore, me synim ndërtimin e një sistemi arsimor që u përgjigjet nevojave të nxënësve, mësimdhënësve dhe zhvillimit afatgjatë të shoqërisë.
