Një 37-vjeçare ka shpëtuar falë ndërhyrjes së shpejtë mjekësore në Shërbimin Emergjent të Spitalit të Përgjithshëm “Sami Haxhibeqiri” në Mitrovicë.
Në njoftim thuhet se pacientja ishte pranuar në gjendje jashtëzakonisht të rëndë, me shenja të theksuara të shokut hemorragjik, si pasojë e një shtatzënie ektopine cornuale, rast i rrallë dhe me rrezik të lartë për jetë.
Pas diagnostikimit të menjëhershëm, ekipet emergjente, kirurgjikale, gjinekologjike dhe të anestezionit vendosën kryerjen e një laparotomie urgjente.
Spitali njoftoi se ndërhyrja u realizua me sukses dhe ishte vendimtare për shpëtimin e jetës së pacientes.
Njoftim:
I shpëtohet jeta një 37-vjeçareje që ishte në rrezik jete
Një rast i rrallë është paraqitur në Shërbimin Emergjent të Spitalit të Përgjithshëm “Sami Haxhibeqiri” në Mitrovicë. Pacientja B. SH. (1988) është pranuar në gjendje jashtëzakonisht të rëndë, me parametra vitalë minimalë, vetëdije të çrregulluar dhe shenja të theksuara të shokut hemorragjik (humbje e madhe e gjakut).
Pas vlerësimit të menjëhershëm klinik nga stafi i Shërbimit Emergjent, si dhe pas ekzaminimeve laboratorike dhe ultrasonografike, u diagnostikua një shtatzëni ektopine cornuale, një rast i rrallë (2–4% e shtatzënive jashtë mitrës), e shoqëruar me gjakderdhje masive dhe rrezik të lartë për jetën e pacientes.
