U.D. i kryeprokurorit të Shtetit, Agron Qalaj, në kolegjiumin e rregullt me kryeprokurorë dhe përfaqësues të prokurorive ka diskutuar për trajtimin e rasteve që ndërlidhen me zgjedhjet e parakohshme të 28 dhjetorit.
“Me këtë rast u.d. Kryeprokurori i Shtetit, z. Agron Qalaj, ka vlerësuar angazhimin e të gjithë prokurorëve, duke theksuar se gjatë procesit zgjedhor, prokuroritë kanë vepruar me vigjilencë dhe profesionalizëm, në përputhje me kompetencat ligjore, me qëllim të garantimit të integritetit të procesit zgjedhor dhe mbrojtjes së vullnetit të qytetarëve të shprehur me votë.”
Ndërsa koordinatorja Nacionale për Zgjedhje, prokurorja Laura Pula, ka dhënë informata për koordinimin ndërmjet prokurorive dhe Koordinatores Nacionale, lidhur me aktivitetet e ndërmarra nga të gjitha prokuroritë themelore në rastet kur është evidentuar ose dyshuar për cenim të procesit zgjedhor, konkretisht në rastet kur është keqpërdorë – falsifikuar vota.
“Edhe kryeprokurorët e të gjitha prokurorive themelore informuan për veprimet konkrete të ndërmarra në hetimet e zhvilluara lidhur me këto raste, konkretisht për grumbullimin e informatave dhe sigurimin e provave relevante, lidhur me dyshimet për manipulim të votave për kandidatët për deputetë të Kuvendit të Republikës së Kosovës.
Në fund të takimit, u.d. kryeprokurori Qalaj kërkoi nga të gjithë kryeprokurorët unifikimin e veprimeve dhe praktikave hetimore nga të gjitha prokuroritë në trajtimin e rasteve që ndërlidhen me këtë proces zgjedhor, konkretisht në rastet kur është keqpërdorë – falsifikuar vota, me qëllim të trajtimit në mënyrë sa më efikase të të gjitha rasteve në nivel vendi.”
