Deputetja e Lidhjes Demokratike të Kosovës (LDK), Hykmete Bajrami, ka reaguar ashpër ndaj paralajmërimeve për rritje të çmimit të energjisë elektrike, duke e cilësuar këtë proces si dëm të drejtpërdrejtë për qytetarët dhe përfitim për atë që ajo e quan “mafia energjetike”.
Në një postim publik, Bajrami ka theksuar se pasurimi i tregtarëve të energjisë po ndodh përmes varfërimit të qytetarëve, duke shtuar se kërkesa e KESCO-s për rritje të çmimit të energjisë nuk është e vetmja dhe as përfundimtare. Sipas saj, kërkesa të ngjashme për rritje çmimesh kanë parashtruar edhe operatorë të tjerë të sektorit energjetik, përfshirë KEDS, KOSTT dhe KEK.
Ajo ka rikujtuar edhe premtimet e kryeministrit Albin Kurti para ardhjes në pushtet, kur, sipas saj, ishte zotuar për ulje të çmimit të energjisë, duke argumentuar se Kosova ka kapacitete të mjaftueshme energjetike.
Bajrami ka paralajmëruar se çdo rritje e çmimit të energjisë ka efekt zinxhir në ekonomi, duke ndikuar drejtpërdrejt në shtrenjtimin e të gjitha produkteve bazë. “Rritja e çmimit të energjisë ka gjithmonë efekt multiplikues dhe gjithmonë negativ,” ka theksuar ajo.
Në fund, ajo ka kritikuar politikat sociale të qeverisë, si ndarjen e 100 eurove gjatë fushatave zgjedhore dhe shtesat për kategori të ndryshme shoqërore, duke i cilësuar ato si pasojë e varfërimit të qytetarëve dhe jo si rezultat i zhvillimit ekonomik.
Postimi përmbyllet me thirrjen e Bajramit që qytetarët të reagojnë dhe të kundërshtojnë çdo vendim që, sipas saj, është i padrejtë nga institucionet publike dhe qeveria.
