Në kryeqytetin serb në Beograd u mbajt Asambleja e 43-të plenare e Konferencës Ipeshkvnore Ndërkombëtare të Shën Çirilit dhe Metodit (KIN), një forum kishtar rajonal me peshë të veçantë institucionale dhe diplomatike në Evropën Qendrore dhe Juglindore.
Në punimet e asamblesë morën pjesë ipeshkvij nga disa vende të rajonit, përfshirë Hungarinë, Bosnjë-Hercegovinën, Kroacinë dhe Rumaninë, si dhe përfaqësues të lartë diplomatikë të Selisë së Shenjtë. Një prani me rëndësi të veçantë ishte edhe ajo e delegatit të ri Apostolik për Kosovën, Imzot Luigi Bianco, çka konfirmoi dimensionin ndërkombëtar dhe ndikimin e këtij forumi. Kosovën në këtë asamble e përfaqësoi Imzot Dodë Gjergji, Ipeshkëv i Dioqezës Prizren–Prishtinë.
Vendimi më i rëndësishëm i kësaj asambleje ishte zgjedhja e Imzot Dodë Gjergjit si President i ri i Konferencës Ipeshkvnore Ndërkombëtare të Shën Çirilit dhe Metodit, me fillim mandati më 1 qershor 2026. Krahas tij, Imzot Fabijan Svalina u zgjodh nënkryetar, ndërsa Imzot Mirko Shtefkoviç sekretar i përgjithshëm i konferencës.
Kjo zgjedhje përbën një zhvillim me rëndësi të veçantë jo vetëm për Kishën Katolike, por edhe për pozitën ndërkombëtare të Republikës së Kosovës. Nga këndvështrimi i Via Veritatis, fakti që një ipeshkëv nga Kosova merr drejtimin e një strukture ndërkombëtare kishtare përfaqëson një fitore simbolike dhe strategjike për subjektivitetin ndërkombëtar të shtetit të Kosovës. Në një rajon ku Kosova vazhdon të përballet me sfida politike dhe diplomatike, ky pozicion rrit dukshmërinë e saj në nivele të larta institucionale, veçanërisht në raport me Selinë e Shenjtë dhe rrjetet e saj diplomatike.
Mandati i ri hap mundësi të reja për afirmimin ndërkombëtar të Kosovës si realitet politik dhe shoqëror i konsoliduar, duke e zhvendosur atë nga periferia e diskursit ballkanik drejt një aktori me zë dhe përfaqësim në tryeza rajonale dhe ndërkombëtare. Në mënyrë konkrete, kjo përforcon rolin e Kosovës në dialogun ndërfetar, diplomacinë kulturore dhe në ndërtimin e imazhit të saj si vend i bashkëjetesës, stabilitetit dhe tolerancës.
Vlen të theksohet se kjo zgjedhje rrjedh nga një proces i brendshëm institucional, i lirë nga presionet politike dhe i bazuar në besimin, autoritetin moral dhe përvojën personale të Imzot Dodë Gjergjit. Pikërisht ky dimension i jep ngjarjes një legjitimitet moral dhe diplomatik, shpesh të munguar në arenën politike ballkanike. Për Kosovën, kjo është dëshmi se ndikimi dhe përfaqësimi ndërkombëtar mund të ndërtohen jo vetëm përmes kanaleve shtetërore, por edhe përmes institucioneve me kredibilitet historik dhe moral.
Në përfundim, zgjedhja e Imzot Dodë Gjergjit si President i Konferencës Ipeshkvnore Ndërkombëtare të Shën Çirilit dhe Metodit shënon një moment të rëndësishëm për Kishën Katolike në Kosovë dhe për vetë Republikën e Kosovës në planin ndërkombëtar, duke hapur një kapitull të ri ndikimi, përfaqësimi dhe përgjegjësie në një rajon ende të brishtë politikisht.
Rreth Konferencës Ipeshkvnore Ndërkombëtare “Shën Çirili e Metodi”
Konferenca Ipeshkvnore Ndërkombëtare e Shën Çirilit dhe Metodit (KIN) është një strukturë që bashkon ipeshkvij dhe klerikë nga dioqeza dhe konferenca ipeshkvnore të vendeve të ndryshme të Evropës Qendrore dhe Juglindore. Anëtarët e saj aktualë janë:
Imzot Rrok Gjonlleshaj – Arqipeshkëv i Tivarit, Zëvendëskryetar i KIN
Imzot Djura Gjugjar – Ipeshkëv i Eparkisë së Shën Nikollës në Ruski Krstur
Imzot Kiro Stojanov – Ipeshkëv i Shkupit dhe Ipeshkëv i Eparkisë së Ngjitjes së Virgjëreshës Mari në Qiell, Strumicë–Shkup
Imzot Dodë Gjergji – Ipeshkëv i Dioqezës Prizren–Prishtinë
Imzot Fabijan Svalina – Ipeshkëv i Sremit
Imzot Fazekas Ferenc – Ipeshkëv i Suboticës
Imzot Mirko Shtefkoviç – Ipeshkëv i Zrenjaninit
Imzot Mladen Vukshiç OFM – Ipeshkëv i Kotorrit
