Interi ka bërë një lëvizje konkrete në merkato duke kërkuar Curtis Jones nga Liverpooli. Lajmi raportohet nga Fabrizio Romano, sipas të cilit zikaltërit kanë kërkuar huazimin e mesfushorit anglez me opsion blerjeje në fund të sezonit.
Bisedimet e para janë zhvilluar sot mes Interit, Liverpoolit dhe përfaqësuesve të lojtarit, por vendimi përfundimtar i takon klubit anglez. Aktualisht nuk ka ende një marrëveshje të mbyllur dhe situata mbetet në fazë fillestare.
Interi do të ecë përpara me këtë operacion vetëm nëse Davide Frattesi largohet. Për mesfushorin italian ekziston një marrëveshje me Nottingham Forest, por vendimi final mbetet në dorën e lojtarit.
Në të njëjtën kohë, Interi dhe Liverpooli kanë diskutuar edhe për Denzel Dumfries si një alternativë e mundshme për krahun e djathtë, por aktualisht nuk ka ofertë zyrtare dhe as negociata të avancuara.
Ditët në vijim priten të jenë vendimtare për të kuptuar nëse pista Curtis Jones do të konkretizohet dhe nëse largimi i Frattesit do të hapë rrugën për afrimin e mesfushorit të Liverpoolit.
