Gjykata Themelore në Prizren ka njoftuar se ka caktuar masën e paraburgimit prej një muajit ndaj pesë personave të dyshuar për veprat penale kundër të drejtës së votimit, keqpërdorimi i detyrës apo autoriteti zyrtar.
Nga Gjykata theksohet edhe se, të dyshuarit, A.Sh., I.B., B.S:, H:P., dyshohen se kanë falsifikuar rezultatet e votimit të zgjedhjeve të 28 dhjetorit, transmeton Gazeta Express.
Kurse N.B, dyshohet se ka kryer veprat penale keqpërdorimi i pozitës apo autoriteti zyrtar
Komunikata:
Caktohet masa e paraburgimit ndaj pesë (5) të pandehurve , për shkak të dyshimit të bazuar se kanë kryer disa vepra penale
Prizren, 30 janar 2026– Gjykata Themelore në Prizren, Departamenti i Krimeve të Rënda, sot ka mbajtur tre (3) seanca dëgjimore, referuar kërkesave të Prokurorisë Themelore në Prizren për caktimin e masës së paraburgimit, ndaj pesë (5) të pandehurve, nën dyshimet për kryerjen e veprave penale kundër të drejtës së votimit, keqpërdorimi i detyrës apo autoriteti zyrtar.
Gjyqtarët e procedurës paraprake, kanë marrë vendim si në vijim: Katër (4) të pandehurve, A.Sh., I.B., B.S:, H:P., i’u është caktuar masa e paraburgimit, në kohëzgjatje prej një (1) muaji, e cila mund të zgjasë deri më datën 28.02.2026 për shkak të dyshimi të bazuar se secili veç e veç ka kryer veprën penale, falsifikimi i rezultateve të votimit nga neni 216 par. 2 lidhur me nenin 31 të KP-së.
Ndaj një (1) të pandehuri, N.B., i është caktuar masa e paraburgimit, në kohëzgjatje prej një (1) muaji, e cila mund të zgjasë deri më datën 28.02.2026 për shkak të dyshimi të bazuar se ka kryer veprat penale, keqpërdorimi i pozitës apo autoriteti zyrtar, nga neni 414 par. 3, nën par. 3.2, (mos kryerja me dashje e ndonjë detyre të domosdoshme të përcaktuar me ligj) të KP-së.
Kurse a do të argumentohen këto fakte do të vlerësohet në fazat e mëtejme të procedurës penale.
