Legjenda e Liverpoolit, Steven Gerrard, ka vlerësuar paraqitjen e sulmuesit Hugo Ekitike pas fitores bindëse të “The Reds” ndaj Newcastle United, duke e krahasuar francezin me ish-bashkëlojtarin e tij, Fernando Torres.
Ekitike realizoi dy gola në këtë takim, ndërsa goli i dytë i tij i la përshtypje të veçantë Gerrardit, i cili tha se i rikujtoi Torresin në kulmin e formës së tij.
“Është gol tipik i Torresit. E nxjerr topin shpejt nga këmbët dhe godet me majë. Çdo herë që e shikoj Ekitiken, më kujton Torresin. Ai shënon gola të ngjashëm – nëse i jep hapësirë në krah, ai vrapon, është shumë i shpejtë, nuk e kap dot dhe është vdekjeprurës,” u shpreh Gerrard pas ndeshjes, raporton RTKLive.
I pyetur për krahasimin dhe fjalët e Gerrardit, Ekitike u shpreh me modesti, duke treguar edhe një detaj interesant nga fëmijëria e tij.
“Të jem i sinqertë, në atë kohë nuk mund ta shikoja Premier League-in, sepse mamaja ime nuk paguante për të. Kam parë disa video në YouTube. Nuk do ta vendos kurrë veten në atë nivel. Ai ishte një lojtar i jashtëzakonshëm,” tha sulmuesi francez.
“Nëse një ditë arrij nivelin e tij, do të ishte fantastike. Duhet të vazhdoj të punoj shumë,” përfundoi Ekitike
