Ish-ministri i Punëve të Jashtme të Kosovës, Enver Hoxhaj, ka mbajtur një fjalim në Kongresin Amerikan në Washington D.C., ku ka kërkuar anëtarësimin e Kosovës në Organizatën e Traktatit të Atlantikut Verior (NATO), duke theksuar rëndësinë strategjike të Ballkanit për sigurinë evropiane.
Hoxhaj ka bërë të ditur pjesëmarrjen e tij përmes një postimi në rrjetin social Facebook, ku ka ndarë edhe fotografi nga Capitol Hill. Në mesazhin e tij, ai ka vënë në pah nevojën që Kosova të integrohet në strukturat euroatlantike si faktor stabiliteti dhe sigurie në rajon.
“Në fjalën time në Capitol Hill kërkova që Kosova të anëtarësohet në NATO. Siguria e Ballkanit është sot çështje kyçe e sigurisë evropiane”, ka shkruar Hoxhaj, transmeton Klankosova.tv.
Ai ka theksuar se stabiliteti i Ballkanit Perëndimor nuk është më vetëm një çështje rajonale, por një komponent thelbësor i arkitekturës së sigurisë evropiane, veçanërisht në dritën e zhvillimeve të reja gjeopolitike dhe sfidave të sigurisë globale.
Sipas Hoxhajt, përfshirja e Kosovës në NATO do të kontribuonte në forcimin e paqes, sigurisë dhe bashkëpunimit ndërkombëtar, duke e pozicionuar vendin si partner të besueshëm në aleancën euroatlantike.
