Është publikuar traileri zyrtar i filmit biografik për Michael Jackson, me titull “Michael”, i cili sjell në qendër të vëmendjes jetën dhe karrierën e një prej figurave më ikonike të historisë së muzikës. Në rolin kryesor shfaqet Jaafar Jackson, nipi i mbretit të pop-it, i cili interpreton xhaxhain e tij në këtë projekt ambicioz kinematografik.
Sipas përmbledhjes zyrtare, filmi rrëfen historinë e Michael Jackson përtej skenës dhe famës, duke ndjekur rrugëtimin e tij që nga zbulimi i talentit të jashtëzakonshëm si lider i Jackson Five, deri në shndërrimin në një artist vizionar, ambicia krijuese e të cilit e shtyu vazhdimisht drejt synimit për t’u bërë artisti më i madh në botë. Filmi synon të pasqyrojë si jetën personale të yllit, ashtu edhe disa nga performancat më ikonike të karrierës së tij solo në vitet e hershme, duke i ofruar publikut një vështrim intim mbi figurën e Michael Jackson.
Megjithatë, as nga përmbledhja zyrtare dhe as nga traileri nuk bëhet ende e qartë nëse filmi do të trajtojë edhe aspektet më të diskutueshme dhe polemikat që shënuan vitet e fundit të jetës së artistit, çështje që prej kohësh kanë ndarë opinionin publik. Filmi mban firmën regjisoriale të Antoine Fuqua, ndërsa kasti përfshin emra të njohur të kinemasë. Miles Teller interpreton rolin e avokatit dhe bashkëpunëtorit të ngushtë të Jackson, John Branca, Colman Domingo shfaqet si babai i tij Joe Jackson, Nia Long në rolin e nënës Katherine Jackson, ndërsa Jessica Sula interpreton motrën e tij, LaToya Jackson.
Në film marrin pjesë gjithashtu Larenz Tate si themeluesi i Motown Records, Berry Gordy, Laura Harrier si producentja muzikore pioniere Suzanne de Passe, Kat Graham në rolin e Diana Ross, si dhe Giuliano Valdi, i cili interpreton Michael Jackson gjatë epokës së Jackson 5. Filmi biografik “Michael” pritet të shfaqet në kinematë botërore më 24 prill 2026, ndërsa publikimi i trailerit ka rritur ndjeshëm pritshmëritë dhe debatet rreth mënyrës se si do të portretizohet jeta e një prej figurave më të ndërlikuara dhe më të adhuruara të muzikës moderne.
