Kryetari i Lidhjes Demokratike të Kosovës, Lumir Abdixhiku, ka pritur sot në takim ambasadorin e Italisë në Kosovë, Maurizio Antonini, me të cilin ka diskutuar zhvillimet e fundit politike në vend dhe situatën aktuale institucionale.
Gjatë takimit, palët kanë shkëmbyer qëndrime lidhur me kontekstin politik pas zgjedhjeve, si dhe për pozicionin e LDK-së karshi gjendjes aktuale dhe proceseve në vazhdim. Abdixhiku ka theksuar rëndësinë e formimit sa më të shpejtë të institucioneve të reja, duke nënvizuar se qytetarët e Kosovës po përballen me sfida të shumta dhe kanë nevojë për institucione funksionale dhe stabilitet politik.
Sipas tij, vonesat në konstituimin e institucioneve po ndikojnë drejtpërdrejt në jetën e përditshme të qytetarëve, duke krijuar pasiguri dhe mungesë veprimi konkret për adresimin e problemeve kryesore.
Kryetari i LDK-së ka shprehur gjithashtu mirënjohjen për mbështetjen e vazhdueshme që Italia i ka dhënë Kosovës ndër vite, në proceset e shtetndërtimit, demokratizimit dhe integrimit evropian. Ai e ka vlerësuar Italinë si një partner të rëndësishëm strategjik dhe një mike të dëshmuar të Kosovës.
Takimi cilësohet si pjesë e komunikimeve të rregullta të LDK-së me përfaqësues të shteteve mike, në funksion të stabilitetit politik dhe forcimit të marrëdhënieve ndërkombëtare të Kosovës.
