Komisioni Evropian ka propozuar një paketë të 20-të sanksionesh kundër Rusisë, që synojnë sektorin e energjisë, shërbimet financiare dhe tregtinë, me qëllim miratimin e saj para përvjetorit të katërt të luftës, më 22 shkurt.
“Komisioni po propozon një paketë të re sanksionesh, të 20-at që nga fillimi i agresionit rus kundër Ukrainës”, tha presidentja e Komisionit, Ursula von der Leyen, transmeton Klankosova.
Kufizime në sektorin e naftës dhe energjisë në Rusi
Paketa e re propozon një ndalim të plotë të shërbimeve detare për transportin e naftës bruto ruse, me qëllim uljen e mëtejshme të të ardhurave nga shitja e produkteve energjetike dhe vështirësimin e gjetjes së blerësve për naftën ruse.
“Meqenëse transporti detar është një biznes global, ne propozojmë që ky ndalim i plotë të miratohet në koordinim me vendet me të njëjtat mendime, pas vendimit të G7”, tha presidentja e Komisionit.
Paketa e re përfshin shtimin e 43 anijeve të tjera nga e ashtuquajtura flotë në hije e Rusisë në listën e anijeve të sanksionuara. Numri i përgjithshëm i anijeve të tilla, të cilat Rusia i përdor për të anashkaluar sanksionet, rritet në 640. Ajo gjithashtu propozon masa për ta bërë më të vështirë për Rusinë sigurimin e cisternave për flotën në hije, si dhe një ndalim gjithëpërfshirës për ofrimin e mirëmbajtjes dhe shërbimeve të tjera për cisternat e LNG-së dhe akullthyeset.
Kufizimet në sistemin financiar rus
Pjesa e dytë e sanksioneve ka të bëjë me masat për të kufizuar sistemin bankar rus dhe aftësinë e tij për të krijuar kanale alternative pagesash për financimin e aktivitetit ekonomik. Njëzet banka të tjera rajonale ruse i shtohen listës së sanksionuara, si dhe disa banka në vende të treta të përfshira në lehtësimin e tregtisë së paligjshme të mallrave të sanksionuara.
Gjithashtu, propozohen masa kundër kriptovalutave, kompanive që i tregtojnë ato dhe platformave që mundësojnë tregtimin e kriptovalutave, për ta bërë më të vështirë anashkalimin e sanksioneve.
Kufizimet e importit dhe eksportit
Pjesa e tretë e paketës së re të sanksioneve i referohet masave që shtrëngojnë kufizimet në eksportin e mallrave dhe shërbimeve në Rusi – nga gomat te traktorët dhe shërbimet e sigurisë kibernetike.
Gjithashtu propozohet një ndalim i ri për importin e metaleve, kimikateve dhe mineraleve kritike që ende nuk janë nën sanksione, si dhe kufizime të mëtejshme për eksportin e artikujve dhe teknologjive të përdorura për përpjekjet e Rusisë në fushën e betejës, të tilla si materialet për prodhimin e eksplozivëve.
Presidentja e Komisionit u bën thirrje shteteve anëtare që ta miratojnë këtë paketë sanksionesh sa më shpejt të jetë e mundur, “në mënyrë që të dërgohet një sinjal i fortë në prag të përvjetorit të zymtë të katërt të kësaj lufte”.
Von der Leyen tha se të ardhurat fiskale të Rusisë nga nafta dhe gazi ranë me 24 për qind në vitin 2025 krahasuar me vitin e kaluar, niveli më i ulët që nga viti 2020.
“Të ardhurat nga nafta dhe gazi në janar do të jenë më të ulëtat që nga fillimi i luftës. Kjo konfirmon atë që e dinim tashmë – se sanksionet tona po funksionojnë dhe ne do të vazhdojmë t’i përdorim ato derisa Rusia të fillojë negociata serioze me Ukrainën për një paqe të drejtë dhe të qëndrueshme”, tha von der Leyen.
