Ish-presidenti amerikan Bill Clinton dhe ish-Sekretarja e Shtetit, Hillary Clinton, janë thirrur për të dëshmuar para Kongresit lidhur me çështjen “Epstein”, dhe kanë kërkuar që seanca dëgjimore të zhvillohet publikisht.
Ish-çifti presidencial demokrat është ftuar për të dëshmuar me dyer të mbyllura para Komitetit Mbikëqyrës të Dhomës së Përfaqësuesve, i drejtuar nga republikanët, që po heton lidhjet e financierit Jeffrey Epstein me figura të fuqishme dhe mënyrën se si është trajtuar informacioni rreth krimeve të tij.
Bill Clinton ka theksuar se një seancë e mbyllur mund të keqpërdoret për qëllime politike, ndërsa Hillary Clinton deklaroi se çifti tashmë kishte ndarë atë që dinë rreth çështjes. “Nëse e doni këtë betejë, le ta bëjmë publikisht. Ju pëlqen të flisni për transparencën. Nuk ka asgjë më transparente se një seancë dëgjimore publike, me kamera të ndezura. Ne do të jemi atje,” tha ajo.
Në dosjet e çështjes “Epstein”, të publikuara nga Departamenti i Drejtësisë, përmenden fotografi dhe takime të ish-presidentit Clinton dhe figurave të tjera botërore, përfshirë Donald Trump.
Megjithatë, asnjëri prej tyre nuk është akuzuar për shkelje në ndërveprimet me Epstein. Ish-çifti presidencial ka deklaruar se nuk ka pasur dijeni për abuzimet seksuale të financierit me vajza të mitura para ngritjes së akuzave.
Sipas raportimeve të mediave amerikane, Hillary Clinton do të dëshmojë më 26 shkurt, ndërsa Bill Clinton do të paraqitet para Komitetit Mbikëqyrës të Dhomës së Përfaqësuesve më 27 shkurt.
