Kuvendi i Kosovës ka zgjedhur pesë nënkryetarët e rinj në kuadër të legjislaturës së dalë nga zgjedhjet e 28 dhjetorit. Emrat e propozuar u votuan në pako, duke marrë mbështetjen e shumicës së deputetëve në sallë.
Nga Lëvizja Vetëvendosje u zgjodh Ardian Gola, nga Partia Demokratike e Kosovës Vlora Çitaku, ndërsa nga Lidhja Demokratike e Kosovës Kujtim Shala. Në mesin e përfaqësuesve të komuniteteve jo shumicë u zgjodhën Slavko Simiq nga Lista Srpska dhe Emilja Rexhepi.
Pro votuan 104 deputetë, tre ishin kundër, ndërsa gjashtë abstenuan.
Votimi në pako i nënkryetarëve përfshiu edhe përfaqësuesin e Listës Srpska, për të cilin ngritën dorën edhe deputetët e Lëvizjes Vetëvendosje, duke siguruar kështu konstituimin e plotë të kryesisë së Kuvendit për mandatin e ri.
