Kryeministri i Mbretërisë së Bashkuar, Keir Starmer, dhe presidenti i Shteteve të Bashkuara të Amerikës, Donald Trump, kanë zhvilluar një bisedë telefonike gjatë së cilës kanë diskutuar mbi luftën në Ukrainë, situatën në Lindjen e Mesme dhe dialogun që po zhvillohet ndërmjet ShBA-së dhe Iranit.
Sipas një deklarate nga zyra e kryeministrit britanik, Starmer ka përsëritur dënimin e tij për sulmet ruse ndaj civilëve në Ukrainë, ndërsa të dy udhëheqësit kanë diskutuar për negociatat në vazhdim me synimin për të arritur një paqe të drejtë dhe të qëndrueshme.
Në fokus të bisedës ka qenë edhe situata në Rripin e Gazës. Starmer ka reflektuar mbi zhvillimet aktuale në rajon dhe ka theksuar rëndësinë e sigurimit të qasjes së vazhdueshme për ndihmën humanitare.
Lufta në Gaza, e nisur më 8 tetor 2023 nga Izraeli, ka zgjatur dy vjet dhe ka shkaktuar pasoja të mëdha humanitare dhe materiale. Sipas të dhënave të raportuara, mbi 72 mijë palestinezë janë vrarë dhe rreth 171 mijë të tjerë janë plagosur, ndërsa rreth 90 për qind e infrastrukturës civile është prekur nga shkatërrimet. Kombet e Bashkuara kanë vlerësuar se kostot e rindërtimit arrijnë në rreth 70 miliardë dollarë.
Në përfundim të bisedës, Starmer dhe Trump kanë konfirmuar angazhimin e përbashkët për të promovuar stabilitetin dhe paqen në Lindjen e Mesme, përfshirë qëndrimin se Irani nuk duhet të zhvillojë armë bërthamore.
