Një mesazh mirënjohjeje dhe mbështetjeje erdhi sot nga veteranët e Ushtrisë Çlirimtare të Kosovës për kryeministrin e Shqipërisë, Edi Rama, pas fjalës së tij në Bordin e Paqes të mbajtur në Uashington.
Organizata e Veteranëve të Luftës së Ushtria Çlirimtare e Kosovës publikoi një reagim të shkurtër, por domethënës: “Faleminderit kryeministër Rama”. Në faqen zyrtare u shpërnda edhe pjesë nga fjalimi i mbajtur në SHBA, ku Rama ngriti çështjen e ish-krerëve të UÇK-së që po përballen me proces gjyqësor në Hagë.
Gjatë fjalës së tij, Rama u shpreh kritik ndaj mënyrës se si po zhvillohet procesi në Dhomat e Specializuara të Kosovës, duke e cilësuar gjykatën si të dështuar dhe duke kërkuar reflektim mbi standardet e drejtësisë ndërkombëtare. Ai foli për ish-udhëheqësit e Kosovës si figura që dolën nga rezistenca ndaj spastrimit etnik për t’u shndërruar në faktorë paqeje.
Në të njëjtin takim, ku mori pjesë edhe presidentja e Kosovës, Vjosa Osmani, kryeministri shqiptar konfirmoi gjithashtu gatishmërinë e Shqipërisë për të kontribuar në përpjekjet ndërkombëtare për paqe në Gaza, përmes angazhimit me trupa në terren.
Qëndrimi i Ramës në Uashington u prit me vlerësim nga veteranët e UÇK-së, të cilët e konsiderojnë mbështetjen e tij si një zë të fortë në mbrojtje të luftës çlirimtare dhe të figurave të saj historike. Për ta, mesazhi i dhënë në Shtetet e Bashkuara përfaqëson jo vetëm një qëndrim politik, por edhe një akt solidariteti kombëtar në një moment të ndjeshëm për Kosovën.
Mbështetja e vazhdueshme e Tiranës zyrtare ndaj ish-krerëve të UÇK-së shihet nga përkrahësit si një thirrje për drejtësi të barabartë dhe trajtim dinjitoz, duke e kthyer këtë debat në një çështje që tejkalon kufijtë institucionalë dhe prek ndjenjën kolektive të historisë dhe sakrificës.
