Kapiteni i Sunderland AFC, Granit Xhaka, është pranë rikthimit në formacionin titullar për përballjen e kësaj të shtune ndaj AFC Bournemouth, pas një muaji mungese për shkak të një dëmtimi në kyçin e këmbës.
Trajneri i skuadrës, Régis Le Bris, konfirmoi se mesfushori është në gjendje të mirë fizike dhe mund ta nisë takimin nga minuta e parë. “Ai mund të startojë sepse është në gjendje të mirë dhe reagoi shumë mirë pas ndeshjes së fundit. Rikthimi i tij është kyç për ritmin dhe organizimin e ekipit,” u shpreh tekniku francez.
Prania e Xhakës në mesfushë konsiderohet thelbësore jo vetëm për kontrollin dhe shpërndarjen e lojës, por edhe për balancën taktike të skuadrës. Rikthimi i tij i jep mundësi talentit të ri Noah Sadiki të luajë më i avancuar, duke shfrytëzuar energjinë dhe dinamizmin në fazën sulmuese.
Në sezonin e parë të klubit në Premier League, eksperienca dhe lidershipi i kapitenit pritet të jenë faktorë vendimtarë për objektivat e Sunderlandit në elitën e futbollit anglez.
