Raportime të fundit nga media amerikane hedhin dritë mbi diskutimet brenda rrethit të ngushtë të këshilltarëve të ish-presidentit Donald Trump lidhur me përshkallëzimin e mundshëm të tensioneve me Iranin.
Sipas një shkrimi të publikuar nga Politico, disa këshilltarë të lartë do të preferonin që Izraeli të ndërmerrte i pari një sulm ndaj Iranit. Dy burime të njohura me diskutimet kanë deklaruar se në nivelet më të larta ekziston bindja se opinioni publik amerikan do ta mbështeste më lehtë një ndërhyrje të SHBA-së në mbrojtje të një aleati, sesa nisjen e një përplasjeje të drejtpërdrejtë me Teheranin pa provokim të qartë.
Një prej burimeve, që foli në kushte anonimiteti, tha se “politika është shumë më e favorshme nëse izraelitët godasin të parët dhe iranianët kundërpërgjigjen ndaj nesh, duke na dhënë më shumë arsye për të vepruar”.
Të njëjtat burime vlerësojnë se, nëse Trump do të zgjidhte një fushatë ushtarake, skenari më i mundshëm do të ishte një veprim i koordinuar SHBA–Izrael, i ngjashëm me sulmet ndaj infrastrukturës bërthamore iraniane verën e kaluar.
Ndërkohë, një zyrtar amerikan i tha agjencisë Reuters se SHBA-ja ka dërguar tashmë një duzinë avionësh luftarakë F-22 në Izrael, hera e parë që Uashingtoni dislokon mjete të tilla për operacione të mundshme lufte në këtë vend. Administrata nuk e ka konfirmuar zyrtarisht vendosjen.
Trump ka deklaruar se preferon një zgjidhje diplomatike të krizës, por ka mbajtur të hapur opsionin e përdorimit të forcës, duke zhvendosur dy aeroplanmbajtëse dhe shkatërrues shoqërues në rajon si demonstrim force. Mes tyre është edhe aeroplanmbajtësja USS Gerald R. Ford, e cila u nis nga një port pranë Kretës drejt brigjeve veriore të Izraelit.
Zhvillimet kanë rritur frikën për një konflikt më të gjerë rajonal. Në qershor të vitit të kaluar, SHBA-ja iu bashkua Izraelit në goditjen e objekteve bërthamore iraniane, ndërsa Teherani ka paralajmëruar kundërpërgjigje të ashpër në rast të një sulmi të ri.
Shtetet e Bashkuara po i bën presion Iranit për një marrëveshje që do të kufizonte programin e tij bërthamor, për të cilin pretendon se synon prodhimin e armës atomike. Irani i mohon akuzat, por ka deklaruar se do t’i qaset me “seriozitet dhe fleksibilitet” bisedimeve që po zhvillohen në Gjenevë.
Tensionet u shtuan më tej pasi Trump deklaroi javën e kaluar se Irani ka 10 deri në 15 ditë kohë për të arritur një marrëveshje, përndryshe do të përballet me “pasoja shumë të rënda”./The Indipendent
