Ministri i Jashtëm i Iranit, Abbas Araghchi, ka deklaruar se Udhëheqësi Suprem i Iranit, Ali Khamenei, është ende gjallë, duke hedhur poshtë raportimet e mediave izraelite për vrasjen e tij gjatë sulmeve të fundit ajrore.
Në një intervistë për NBC News, Araghchi tha se “për aq sa di unë”, Khamenei është gjallë dhe se të gjithë zyrtarët e lartë të regjimit kanë mbijetuar.
“Të gjithë zyrtarët e lartë janë gjallë. Pra, të gjithë janë tani në pozicionet e tyre dhe ne po e trajtojmë këtë situatë, dhe gjithçka është në rregull,” u shpreh ai.
Sipas ministrit, dy komandantë iranianë kanë humbur jetën gjatë sulmeve, por figura kyçe të sistemit politik, përfshirë kreun e gjyqësorit dhe kryetarin e parlamentit, nuk janë prekur. Ai shtoi se edhe presidenti Masoud Pezeshkian është gjallë.
Deklarata e Araghchit erdhi si kundërpërgjigje ndaj raportimit të kanalit izraelit Channel 12, i cili citoi burime të sigurisë që vlerësonin se Khamenei “ka shumë të ngjarë të jetë vrarë” në sulmet ajrore. NBC News ka theksuar se nuk ka mundur të verifikojë në mënyrë të pavarur pretendimet e ministrit iranian.
Araghchi kritikoi ashpër SHBA-në dhe Izraelin për nisjen e sulmeve, duke i cilësuar si veprime të papërgjegjshme në një kohë kur negociatat bërthamore janë ende në zhvillim. Ai shtoi se Teherani është i interesuar për uljen e tensioneve dhe është i gatshëm për bisedime sapo të përfundojnë sulmet e përbashkëta.
