Sindikata e Bashkuar e Arsimit, Shkencës dhe Kulturës (SBAShK) ka bërë të ditur se po kërkon një takim me ministrin e ri të Arsimit, Hajrullah Çekun, për të diskutuar rritjen e pagave të mësimdhënësve.
Në emisionin “tre8tre”, nënkryetarja e SBAShK-ut, Vjollca Shala, theksoi se kërkesa për rritje të koeficientit të pagave bazohet në rritjen e inflacionit dhe koston e lartë të jetesës. Ajo bëri krahasime me pagat e mësimdhënësve në rajon, duke vlerësuar se ato në Kosovë janë më të ulëta se në Shqipëri, Maqedoni dhe Mali të Zi.
“Në bazë të rritjes ekonomike dhe inflacionit, veçanërisht kur shohim shportën për një familje, ka një rritje enorme. Pagat tona nuk mjaftojnë”, tha Shala, duke shtuar se vlera aktuale e koeficientit prej 110 euro është shumë e ulët dhe nuk duhet të jetë më e vogël se 150 euro.
SBAShK-u ka bërë të ditur se preferon dialogun si mënyrën e parë për arritjen e marrëveshjes me Ministrinë e Arsimit, ndërsa greva konsiderohet si opsioni i fundit. Shala kujtoi se që nga greva pesëjavore e vitit 2022 nuk është zhvilluar asnjë takim me përfaqësues të ministrisë.
Kërkesa e sindikatës reflekton shqetësimin për gjendjen financiare të punonjësve të arsimit dhe presionin për të ruajtur standardet e jetesës në një kohë të rritjes së çmimeve.
