Kryetari i Lëvizja Vetëvendosje, njëherësh kryeministri i Kosovës, Albin Kurti, ka propozuar që subjekti që ai drejton të dalë me kandidat partiak për president, nëse dështon përpjekja për gjetjen e një figure unifikuese.
Gjatë fjalimit në mbledhjen e Këshillit të Përgjithshëm të partisë, Kurti foli për hapat e ndërmarrë deri më tani në funksion të zgjedhjes së kreut të shtetit. Ai tha se fillimisht ka zhvilluar takime me përfaqësues të partive opozitare, me synimin për të arritur konsensus rreth një kandidature që do të siguronte mbështetje të gjerë në Kuvend.
Sipas tij, një nga emrat e propozuar ka qenë profesori Murat Jashari, të cilin e cilësoi si figurë unifikuese dhe me respekt publik, por që kishte refuzuar ofertën për kandidim.
“Zgjedhja e një figure si Murat Jashari edhe sot do të ishte zgjedhja e duhur në momentin e duhur. Pra ky do të ishte dhe vazhdon të mbetet rasti ideal”, deklaroi Kurti para anëtarëve të Këshillit.
Ai bëri të ditur se pas takimit të dytë me kryetarin e Partia Demokratike e Kosovës, Bedri Hamza, i është komunikuar qëndrimi i kryesisë së kësaj partie se presidenti i ri duhet të vijë nga radhët e PDK-së.
“Kandidati mund të vijë nga cilido subjekt, por në fund zgjedhjen për president nuk e garanton përkatësia partiake, por votat në Kuvend. Nëse nuk arrijmë të gjejmë një figurë unifikuese që siguron mbështetjen e së paku 80 deputetëve, atëherë një nga opsionet e mbetura është që çdo subjekt të propozojë kandidatin e vet partiak dhe të gjithë t’i nënshtrohen garës brenda Kuvendit”, theksoi ai.
Kurti njoftoi gjithashtu se të nesërmen do të ftojë në takim kryetarin e Lidhja Demokratike e Kosovës, Lumir Abdixhiku, për të diskutuar rreth procesit të zgjedhjes së presidentit.
Në përmbyllje, ai tha se përpjekjet e mazhorancës mbeten të orientuara drejt arritjes së një marrëveshjeje politike, në mënyrë që të shmanget mundësia e zgjedhjeve të reja parlamentare.
