Kryetari i Lidhjes Demokratike të Kosovës, Lumir Abdixhiku, ka bërë të ditur se nuk do të zhvillojë më takime me kryeministrin Albin Kurti lidhur me çështjen e presidentit. Deklarata e tij erdhi të enjten, me një ton të qartë zhgënjimi dhe mosbesimi ndaj mënyrës se si, sipas tij, është trajtuar procesi.
Abdixhiku tha se procesi tashmë është “kompromentuar rëndë”, duke pretenduar se ndërkohë që zhvilloheshin takime dhe bisedime mes palëve, nga ana tjetër po ndërtoheshin skenarë për t’ia faturuar përgjegjësinë opozitës.
Sipas tij, deklarimet e fundit nga Presidenca kanë zbuluar një realitet tjetër nga ai që paraqitej në tavolinën e bisedimeve.
“Procesi është kompromentuar tani. Mbrëmë kuptova nga deklarimet e Presidencës se deri sa ne kemi qenë në biseda, ata kanë shkuar kanë kërkuar fajësime për opozitën. Në një anë je në tavolinë me dikë, në anën tjetër bën skenar të fajësimit. Ky është kompromentim i rëndë i procesit”, ka deklaruar Abdixhiku.
Në këto rrethana, ai ka bërë të qartë se nuk sheh më arsye për të vazhduar takimet me Kurtin për këtë çështje.
Deklarata e tij lë të kuptohet për një klimë të brishtë politike, ku përpjekjet për konsensus rrezikojnë të zëvendësohen nga akuza të ndërsjella dhe mungesë besimi. Në vend të afrimit të qëndrimeve, procesi për zgjedhjen e presidentit duket se po largohet edhe më shumë nga një zgjidhje e përbashkët, duke thelluar hendekun mes pushtetit dhe opozitës.
