Ish-kryeministri i Kosovës dhe ish-kryetari i Lidhjes Demokratike të Kosovës, Isa Mustafa, e ka cilësuar dekretin e presidentes Vjosa Osmani për shpërndarjen e Kuvendi i Kosovës si një vendim të arsyeshëm dhe të mbështetur në rrethanat kushtetuese të krijuara.
Në një prononcim për media, Mustafa tha se vendimi i presidentes për shpërndarjen e Kuvendit është ndër ato raste kur veprimi institucional ka qenë i qëlluar dhe i bazuar në situatën e krijuar pas dështimit të Kuvendit për të nisur në kohë procedurat për zgjedhjen e presidentit të ri.
Sipas tij, zhvillimet e fundit kanë dëshmuar se institucionet duhet të funksionojnë brenda afateve dhe përgjegjësive që përcakton Kushtetuta, duke shtuar se situatat e zvarritjes apo bllokimit institucional nuk i shërbejnë stabilitetit të vendit.
“Është ndër vendimet e saj të rralla që është krejtësisht i qëlluar dhe i bazuar. Duhet të ndërpritet tallja me institucionet më të larta të Republikës së Kosovës”, deklaroi Mustafa.
Dekreti për shpërndarjen e Kuvendit u publikua nga presidentja Osmani pasi deputetët nuk arritën të fillojnë procedurat për zgjedhjen e kreut të ri të shtetit brenda afatit kushtetues. Mandati i presidentes aktuale përfundon më 4 prill, ndërsa afati për nisjen e procedurave për zgjedhjen e presidentit ishte deri më 5 mars.
Pas shpërndarjes së Kuvendit, Osmani ka bërë të ditur se do të zhvillojë konsultime me përfaqësuesit e partive politike për të caktuar datën e zgjedhjeve të reja, si hap i domosdoshëm pas këtij vendimi institucional.
