Kryeministri i Kosovës, Albin Kurti, ka uruar të gjithë mësuesit me rastin e Ditës së Mësuesit, duke shprehur mirënjohje për kontributin e tyre në arsimimin dhe formimin e brezave të rinj.
Përmes një postimi publik, Kurti theksoi se mësimdhënësit përbëjnë një shtyllë të rëndësishme të shoqërisë, pasi ata jo vetëm që përcjellin dije dhe njohuri, por edhe formësojnë mendimin kritik, kultivojnë vlera dhe edukojnë qytetarë të përgjegjshëm.
Kryeministri vuri në pah edhe rolin historik të arsimit në gjuhën shqipe, duke kujtuar se ai ka qenë ndër vite një akt përkushtimi dhe rezistence kombëtare, falë të cilit janë ruajtur dhe zhvilluar gjuha, kultura dhe atdhedashuria ndër breza.
Në mesazhin e tij, Kurti përmendi edhe lidhjen simbolike të 7 Marsit me ditët e Epopesë së UÇK-së, duke kujtuar figurën e mësuesit patriot nga Prekazi, Shaban Jashari. Ai theksoi se Shaban Jashari mishëronte ndërthurjen mes mësimit për jetën dhe dashurisë për atdheun, ndërsa familjen Jashari e cilësoi pjesë të pandashme të historisë së Kosovës.
Në fund të urimit, Kurti falënderoi të gjithë mësuesit dhe mësueset për punën dhe përkushtimin e tyre të palodhur, duke theksuar se investimi në arsim dhe mbështetja për mësuesit dhe nxënësit mbetet një ndër prioritetet kryesore të qeverisë.
