NATO ka konfirmuar se do të marrë pjesë në një stërvitje të përbashkët ushtarake me ushtrinë e Serbisë, e cila pritet të zhvillohet gjatë muajit maj në territorin serb.
Sipas një njoftimi të publikuar nga komanda e NATO-s në Napoli, Ballkani Perëndimor mbetet një rajon me rëndësi strategjike për aleancën dhe aktivitetet e përbashkëta ushtarake konsiderohen të rëndësishme për forcimin e bashkëpunimit dhe stabilitetit në rajon.
Në njoftim thuhet se stërvitja do të zhvillohet në zonën e Borovacit në Serbi dhe do të realizohet me ftesë të autoriteteve serbe. NATO thekson se aktiviteti do të zhvillohet duke respektuar politikën e deklaruar të neutralitetit ushtarak të Serbisë.
Sipas aleancës, stërvitjet e përbashkëta synojnë të përmirësojnë ndërveprimin mes forcave ushtarake, të forcojnë bashkëpunimin praktik dhe të kontribuojnë në stabilitetin e Ballkanit Perëndimor.
NATO gjithashtu ka vlerësuar partneritetin që mban me Serbinë dhe ka theksuar se pret të bashkëpunojë me ushtrinë serbe gjatë realizimit të kësaj stërvitjeje ushtarake në muajt e ardhshëm.
