Shtetet e Bashkuara dhe Izraeli kanë kryer sulme ajrore gjatë natës ndaj pesë objekteve të naftës në dhe përreth kryeqytetit iranian, Teheran, duke shkaktuar vdekjen e katër personave dhe dëme në infrastrukturën energjetike.
Lajmi është konfirmuar nga drejtori ekzekutiv i Kompanisë Kombëtare për Shpërndarjen e Produkteve të Naftës në Iran, Keramat Veyskarami, i cili tha për televizionin shtetëror se katër depo nafte dhe një qendër transporti të produkteve të naftës në Teheran dhe provincën Alborz u goditën nga avionë luftarakë gjatë natës.
Sipas tij, nga sulmi humbën jetën katër punonjës, mes tyre edhe dy shoferë cisternash të naftës. Ai shtoi se objektet pësuan dëme, por zjarri u vu nën kontroll nga ekipet emergjente.
Mëngjesin e së dielës, tymi nga zjarret vazhdonte të qëndronte mbi kryeqytetin iranian, duke krijuar një mjegull të errët mbi qytet, ndërsa banorët raportuan se në ajër ndihej ende era e djegies.
Ushtria izraelite deklaroi se objektet e goditura përdoreshin nga forcat iraniane për të furnizuar me karburant infrastrukturën ushtarake. Sipas saj, këto depo shërbenin për shpërndarjen e karburantit për konsumatorë të ndryshëm, përfshirë edhe entitete ushtarake në Iran.
Pamje dhe video nga shpërthimet në Teheran dhe në qytetin fqinj Karaj kanë qarkulluar gjerësisht në rrjetet sociale, ku shihen flakë të mëdha që ngrihen në qiell pas goditjeve. Këto sulme konsiderohen ndër të parat që kanë shënjestruar drejtpërdrejt infrastrukturën energjetike iraniane që nga fillimi i operacioneve ushtarake më 28 shkurt.
Autoritetet iraniane deklaruan se depot e naftës në vend kanë rezerva të mjaftueshme të benzinës dhe se furnizimi nuk pritet të ndërpritet.
Sulmet vijnë në një moment tensioni të lartë në Lindjen e Mesme. Më 28 shkurt, SHBA dhe Izraeli ndërmorën një seri sulmesh ndaj Iranit, ku u vra lideri suprem iranian, Ajatollah Ali Khamenei, duke shkaktuar përshkallëzim të konfliktit në rajon.
Në përgjigje, Irani ka ndërmarrë sulme me dronë dhe raketa ndaj Izraelit, si dhe ndaj interesave amerikane në rajon.
