Çmimet e produkteve dhe shërbimeve të konsumit në Kosovo kanë shënuar rritje të ndjeshme gjatë muajit shkurt 2026. Sipas të dhënave të publikuara nga Agjencia e Statistikave të Kosovës (ASK), Indeksi i Harmonizuar i Çmimeve të Konsumit (IHÇK) ka shënuar një rritje mesatare vjetore prej 6% krahasuar me muajin shkurt të vitit 2025.
Raporti tregon se edhe në nivel mujor është regjistruar rritje e çmimeve. Inflacioni në shkurt 2026, krahasuar me janarin e të njëjtit vit, ka arritur në 0,6 për qind, duke reflektuar një trend të vazhdueshëm të shtrenjtimit të produkteve dhe shërbimeve në treg.
Sipas ASK-së, rritja vjetore e çmimeve është ndikuar kryesisht nga shtrenjtimi në disa kategori të rëndësishme të konsumit. Rritja më e theksuar është regjistruar te shërbimet që lidhen me pajisjet personale të transportit, të cilat janë shtrenjtuar për 42,5 për qind. Po ashtu, rritje të mëdha janë shënuar te biletat e fluturimeve me 39 për qind, si dhe te furnizimi me ujë dhe shërbimet që lidhen me mirëmbajtjen e banesës, të cilat janë rritur për 33,4 për qind.
Shtrenjtim të konsiderueshëm kanë pësuar edhe disa produkte dhe shërbime të tjera të përditshme, përfshirë lëndët djegëse të ngurta si drutë dhe peleti (16,8 për qind), pemët (16,4 për qind), mirëmbajtja dhe riparimi i pajisjeve personale të transportit (15,1 për qind), si dhe mishi (14,7 për qind). Rritje janë regjistruar gjithashtu te pushimet e organizuara, shërbimet ambulantore, shërbimet hoteliere, si dhe te produktet si kafeja, çaji dhe kakao.
Sa i përket ndryshimeve mujore, rritja prej 0,6 për qind në shkurt është ndikuar kryesisht nga shtrenjtimi i shërbimeve që lidhen me pajisjet personale të transportit, si dhe nga rritja e çmimeve të perimeve, pemëve, mishit dhe shërbimeve hoteliere. Në të njëjtën kohë janë shënuar edhe disa ulje, përfshirë biletat e fluturimeve, energjinë elektrike dhe produktet e qumështit, të cilat kanë ndikuar në uljen e pjesshme të indeksit të përgjithshëm të çmimeve.
Të dhënat e fundit të ASK-së tregojnë se presioni inflacionist në Kosovë mbetet i pranishëm, veçanërisht në sektorët e shërbimeve dhe produkteve ushqimore, duke ndikuar drejtpërdrejt në koston e jetesës për qytetarët.
