Bashkimi Demokratik për Integrim (BDI) ka reaguar ndaj deklaratave të kryeministrit të Republika e Maqedonisë së Veriut, Hristijan Mickoski, lidhur me çështjen e dhënies së provimit të jurisprudencës në gjuhën shqipe, pasi ai e cilësoi këtë si një “problem të trashëguar”.
Në reagimin e saj, BDI thekson se paraqitja e kësaj çështjeje si problem është një përpjekje për të shmangur përgjegjësinë për moszbatimin e një të drejte që, sipas tyre, buron drejtpërdrejt nga Kushtetuta dhe nga ligjet në fuqi.
Sipas partisë, gjuha shqipe është gjuhë zyrtare në Republika e Maqedonisë së Veriut dhe respektimi i saj në institucionet shtetërore nuk është çështje interpretimi politik, por detyrim kushtetues dhe ligjor.
BDI thekson se ligji për përdorimin e gjuhëve është miratuar për të garantuar barazinë gjuhësore dhe për të përforcuar karakterin multietnik të shtetit, ndërsa përpjekjet për ta paraqitur atë si problem apo për të zhvendosur përgjegjësinë, sipas tyre, nuk i shërbejnë stabilitetit institucional.
“Studentët shqiptarë nuk kërkojnë privilegje, por vetëm zbatimin e Kushtetutës dhe të ligjeve në fuqi”, thuhet në reagim.
Më tej theksohet se qeveria ka obligim të zbatojë ligjin dhe jo ta relativizojë atë përmes arsyetimeve politike. Sipas BDI-së, çdo vonesë apo pengesë në realizimin e kësaj të drejte përbën hap prapa për barazinë dhe për standardet demokratike të shtetit
