Presidentja e Meksikës, Claudia Sheinbaum ka mirëpritur bisedimet mes SHBA-së dhe Kubës, që synojnë lehtësimin e marrëdhënieve të tensionuara mes dy vendeve, ndërsa ka dënuar embargon e imponuar ndaj popullit kuban për shumë vite.
Më herët, presidenti kuban Miguel Díaz-Canel deklaroi se përfaqësuesit kubanë ishin takuar së fundmi me zyrtarë të qeverisë amerikane për të gjetur një zgjidhje të mundshme për dallimet dypalëshe që ekzistojnë mes dy vendeve.
“Meksika do të promovojë gjithmonë paqen dhe dialogun diplomatik, veçanërisht përballë kësaj padrejtësie që i është shkaktuar popullit kuban për shumë vite përmes embargos, e cila ka shkaktuar një sërë problemesh”, u tha Sheinbaum gazetarëve gjatë konferencës së saj të përditshme për shtyp.
Nën drejtimin e presidentit Donald Trump, Uashingtoni ka rritur presionin ekonomik ndaj Kubës, me synimin për të ndërprerë rrjedhën e valutës së huaj dhe të naftës drejt ishullit në Karaibe.
Trump ka deklaruar vazhdimisht se Kuba është në prag të kolapsit për shkak të mungesës së naftës dhe parave, duke pretenduar gjithashtu se negociatat me Havanën janë në zhvillim.
Havana humbi një partner kyç kur lideri venezuelian Nicolás Maduro u arrestua nga ushtria amerikane në fillim të janarit.
Më vonë, Trump kërcënoi me vendosjen e tarifave ndaj furnizuese të naftës për Kubën, duke e nxitur Meksikën – furnizuesen kryesore të ishullit kohët e fundit – të ndalonte dërgesat.
E pyetur nëse qeveria meksikane kishte gjetur një mënyrë për t’i dërguar naftë Kubës, Sheinbaum u përgjigj se po shqyrtoheshin alternativa të ndryshme.
