Sulmuesi i Real Madrid, Kylian Mbappe, është gati të rikthehet nga lëndimi në ndeshjen e kthimit kundër Manchester City në fazën e 1/8-s së finales së Champions League.
Mbappe kishte munguar në ndeshjen e parë të zhvilluar javën e kaluar në Madrid për shkak të një lëndimi në gju, ndeshje që madrilenët e fituan me rezultat 3:0.
Megjithatë, sulmuesi francez, i cili këtë sezon ka shënuar tridhjetë e tetë gola në tridhjetë e tri paraqitje, pritet të jetë në dispozicion për takimin në stadiumin “Etihad”.
“Mbappe është gati të luajë”, ka deklaruar trajneri i Real, Alvaro Arbeloa. “Mezi pres ta shoh sërish në fushë, të shijoj lojën e tij dhe golat që ai shënon. Sigurisht që do të jetë shumë i rëndësishëm për ekipin”.
Ndërkohë, mesfushori anglez Jude Bellingham ka udhëtuar me skuadrën, ndërsa vazhdon rikuperimin nga një lëndim. Megjithatë, ai nuk pritet të luajë në ndeshjen kundër City.
“Bellingham donte të ishte me shokët e skuadrës. Jam shumë i lumtur që po afrohet sërish me ekipin. Është e rëndësishme që ai të jetë pranë bashkëlojtarëve, gjatë mbledhjeve të ekipit dhe në pushimin e pjesës së parë, sepse është një nga liderët tanë”, ka thënë Arbeloa.
Real Madrid pritet të kërkojë eliminimin e Manchester City për të tretin sezon radhazi në Champions League, pasi ka krijuar një avantazh të madh nga ndeshja e parë.
Mbrojtësi i Realit, Antonio Rudiger,ka theksuar se një nga çelësat e ndeshjes do të jetë ndalimi i sulmuesit të City, Erling Haaland.
“Është kënaqësi e madhe të luash kundër lojtarëve si Haaland. Më pëlqen përballja fizike dhe mezi e pres këtë duel. Ai është një sulmues i klasit botëror dhe shumë i fortë”, ka thënë Rudiger.
Mbrojtësi gjerman ka reaguar edhe ndaj deklaratave të fundit të futbollistit të Getafe, Diego Rico, i cili e kishte akuzuar për një ndërhyrje të ashpër në një ndeshje të fundit.
“Në përsëritje të ngadalësuar duket keq, por në momentin e aksionit nuk ishte ashtu siç u tha. Nuk kishte nevojë të ekzagjerohej situata. Unë jam një lojtar që luan fort në fushë, por gjithmonë kam kufijtë e mi. Në fund të fundit, jam edhe unë një qenie njerëzore”, është shprehur Rudiger
