Presidenti i Shteteve të Bashkuara të Amerikës, Donald Trump, deklaroi të hënën se fushata ushtarake e SHBA-së në Iran ka rezultuar në “shfarosjen” e ushtrisë iraniane, duke e përshkruar vendin si një “tigër letre” brenda vetëm dy javësh.
Duke folur gjatë një dreke me anëtarët e bordit të Qendrës Kennedy në Dhomën Lindore të Shtëpisë së Bardhë, Trump tha se Irani kishte qenë një “terror për 47 vjet” dhe se SHBA-të kishin goditur mbi 7,000 objektiva në të gjithë vendin, duke zvogëluar sulmet me raketa dhe dronë të Iranit me 90–95%.
Trump shtoi se sulmet amerikane në ishullin strategjik Kharg kishin shmangur objektet energjetike, por paralajmëroi se kjo mund të ndryshojë në çdo moment.
Presidenti amerikan gjithashtu bëri thirrje për krijimin e një force detare ndërkombëtare për të siguruar kalimin e sigurt në Ngushticën e Hormuzit. Ai shtoi se disa vende janë në rrugë për t’u përfshirë, megjithëse disa nuk ishin “entuziaste” për t’u bashkuar.
“Ne i inkurajojmë fuqimisht kombet e tjera të përfshihen me ne dhe të reagojnë shpejt dhe me entuziazëm të madh”, tha Trump, duke theksuar se SHBA-të kanë mbrojtur aleatët e tyre për 40 vjet, shpesh pa mbështetje të mjaftueshme nga partnerët ndërkombëtarë.
