Superylli argjentinas Lionel Messi ka arritur një tjetër moment historik në karrierën e tij, duke shënuar golin e 900-të në nivel profesionist, një arritje që e vendos mes futbollistëve më të mëdhenj të të gjitha kohërave.
38-vjeçari realizoi këtë gol në ndeshjen e Inter Miami ndaj Nashville SC, në kuadër të Concacaf Champions Cup, duke shënuar vetëm shtatë minuta pas fillimit të takimit.
Që prej transferimit në SHBA në vitin 2023, Messi ka qenë vendimtar për Inter Miami, duke realizuar 81 gola në 92 paraqitje dhe duke ndihmuar ekipin të fitojë trofe të rëndësishëm.
Karriera e tij e jashtëzakonshme përfshin edhe periudhat e arta te Barcelona dhe Paris Saint-Germain, si dhe sukseset me Argjentinen, me të cilën ka fituar edhe Kupën e Botës. Messi është fitues i tetëfishtë i Topit të Artë.
Sipas statistikave, shumica e golave të tij janë shënuar me këmbën e majtë (755), ndërsa pjesa tjetër me të djathtën, me kokë apo në mënyra të tjera. Ai ka realizuar 724 gola brenda zonës dhe 176 nga jashtë saj, përfshirë 112 penallti dhe 70 goditje dënimi.
Messi bëhet vetëm futbollisti i dytë në histori që arrin shifrën e 900 golave, pas rivalit të tij të përhershëm Cristiano Ronaldo, i cili e arriti këtë shifër në vitin 2024 dhe vazhdon të kryesojë renditjen me mbi 950 gola.
Emra legjendarë si Pele dhe Romario mbeten gjithashtu në listën e golashënuesve më të mëdhenj në histori, por pa arritur këtë shifër në statistikat zyrtare.
Trajneri i Inter Miami, Javier Mascherano, e ka cilësuar Messin si “një në një milion”, duke theksuar privilegjin për ta parë nga afër një karrierë kaq të jashtëzakonshme.
