Liderët e Bashkimit Evropian kanë kritikuar ashpër kryeministrin e Hungarisë, Viktor Orbán, për bllokimin e një pakete kredie prej 90 miliardë eurosh për Ukrainën, duke paralajmëruar se kjo lëvizje rrezikon unitetin dhe besueshmërinë e bllokut.
Pas samitit në Bruksel, disa liderë evropianë e akuzuan Orbanin për pengimin e një vendimi kyç për mbështetjen e Ukrainës në luftën e saj me Rusinë.
Kryeministri i Belgjikës, Bart De Wever, e cilësoi bllokimin si një veprim që dëmton vetë BE-në, duke paralajmëruar se mund të ketë pasoja për Hungarinë nëse vazhdon kjo qasje. Ndërkohë, presidenti francez Emmanuel Macron theksoi se ngërçi mund të dobësojë më tej Ukrainën në një moment kritik dhe të minojë besueshmërinë e BE-së në skenën ndërkombëtare.
Nga ana tjetër, kancelari gjerman Friedrich Merz e quajti qëndrimin e Hungarisë “një akt flagrant mosbesnikërie”, ndërsa kryeministri polak Donald Tusk akuzoi Orbanin për përdorim të procedurave për të bllokuar ndihmën për arsye të politikës së brendshme.
Presidentja e Komisionit Evropian, Ursula von der Leyen, deklaroi se BE-ja do të gjejë mënyra që Ukraina të përfitojë fondet, pavarësisht pengesave aktuale.
Paketa financiare, e miratuar në dhjetor 2025 për periudhën 2026–2027, mbetet e bllokuar nga Hungaria, e cila kërkon rifillimin e tranzitit të naftës ruse përmes gazsjellësit Druzhba si kusht për heqjen e vetos.
Ndërkohë, tensionet mes palëve vazhdojnë, teksa vendet anëtare të BE-së po shqyrtojnë alternativa për të mbështetur Ukrainën, në mungesë të një zgjidhjeje të menjëhershme brenda bllokut.
