Autoritetet në Iran kanë ekzekutuar tre persona të akuzuar për vrasjen e policëve gjatë protestave të janarit, në një zhvillim që ka shkaktuar reagime të forta nga organizatat ndërkombëtare të të drejtave të njeriut.
Sipas mediave shtetërore, të dënuarit – Mehdi Ghasemi, Saleh Mohammadi dhe Saeed Davoudi – u varën në qytetin Qom, pasi u shpallën fajtorë për akuzën e “luftës kundër Zotit” (moharebeh), një vepër kapitale sipas ligjit islamik në vend. Autoritetet i akuzuan ata për përfshirje në vrasjen e dy policëve dhe për veprime në favor të Izraeli dhe Shteteve të Bashkuara të Amerikës.
Organizatat për të drejtat e njeriut, përfshirë Amnesty International dhe Iran Human Rights, kanë deklaruar se të tre personat janë dënuar pas proceseve të padrejta gjyqësore dhe se rrëfimet e tyre janë marrë nën torturë. Sipas tyre, njëri nga të ekzekutuarit, Saleh Mohammadi, ishte vetëm 19 vjeç dhe kishte marrë pjesë në gara ndërkombëtare të mundjes.
Këto janë ekzekutimet e para të shpallura zyrtarisht që lidhen me protestat mbarëkombëtare, të cilat nisën në fund të vitit të kaluar për shkak të rritjes së kostos së jetesës dhe u shndërruan në demonstrata kundër qeverisë. Sipas grupeve të të drejtave të njeriut, mijëra persona, kryesisht protestues, janë vrarë gjatë shtypjes së dhunshme të protestave nga forcat e sigurisë.
Organizatat paralajmërojnë për rrezikun e një vale të re ekzekutimesh, sidomos në sfondin e përshkallëzimit të konfliktit rajonal me Izraelin dhe përfshirjen e Shteteve të Bashkuara të Amerikës.
Ndërkohë, autoritetet iraniane kanë mbrojtur veprimet e tyre, duke deklaruar se do të vazhdojnë ndëshkimin e ashpër ndaj personave të përfshirë në akte të dhunshme gjatë protestave. Sipas të dhënave të organizatave ndërkombëtare, Irani mbetet një nga vendet me numrin më të lartë të ekzekutimeve në botë.
