Qeveria e Spanjës ka miratuar një paketë ndihme prej 5 miliardë eurosh për të përballuar rritjen e çmimeve të naftës dhe energjisë, si pasojë e tensioneve dhe konfliktit në Iran.
Kryeministri Pedro Sánchez njoftoi në Madrid se qeveria do të ulë taksën mbi energjinë elektrike nga 21% në 10%, si dhe do të heqë disa tarifa të tjera që rëndojnë mbi konsumatorët. Masat janë pjesë e një pakete më të gjerë prej 80 vendimesh të miratuara në një mbledhje të jashtëzakonshme të kabinetit dhe që pritet të hyjnë në fuqi menjëherë.
Rritja e çmimeve të karburanteve në tregjet globale ka shtyrë vendet evropiane të ndërmarrin masa për të mbrojtur qytetarët dhe bizneset nga kostot në rritje. Spanja synon të zbusë ndikimin ekonomik përmes lehtësirave fiskale dhe ndërhyrjeve direkte në sektorin e energjisë.
Paralelisht, autoritetet spanjolle po punojnë për të rritur importet e gazit natyror nga Algjeria përmes tubacioneve ekzistuese, duke diversifikuar furnizimin energjetik. Spanja është gjithashtu një importues i madh i gazit të lëngshëm, me Katarin si një nga furnizuesit kryesorë, i cili së fundmi është prekur nga sulmet iraniane.
Megjithatë, falë investimeve në energjinë e ripërtëritshme, Spanja mbetet relativisht më e mbrojtur krahasuar me krizat e mëparshme, duke ruajtur disa nga çmimet më të ulëta të energjisë elektrike në Evropë, pavarësisht presioneve në rritje në tregjet ndërkombëtare të naftës dhe gazit.
