Ambasadori i Gjermanisë në Kosovë, Rainer Rudolph, ka theksuar se zbatimi i ligjit për të huajt duhet të bëhet me kujdes, duke pasur parasysh ndikimin në jetën e përditshme të qytetarëve.
Në një deklaratë për RTK, Rudolph tha se partnerët ndërkombëtarë kanë qenë të fokusuar kryesisht në aspektin praktik të implementimit të ligjit, duke kërkuar që ai të mos krijojë vështirësi, veçanërisht për komunitetet pakicë.
Ai bëri të ditur se për këtë çështje ka pasur koordinim të vazhdueshëm me Qeverinë e Kosovës dhe me komunat që preken më së shumti nga ky ligj.
Sipas tij, një ndër prioritetet kryesore duhet të jetë që zbatimi i ligjit të mos ndikojë negativisht në funksionimin e shërbimeve bazë, si ato shëndetësore dhe arsimore.
Deklaratat e ambasadorit vijnë në një kohë kur ligji për të huajt ka nxitur diskutime për efektet e tij në terren dhe nevojën për një qasje të balancuar gjatë zbatimit.
