Presidentja e Republikës së Kosovës, Vjosa Osmani, ka pritur sot në takim ambasadorin e Germanisë në Kosovë, Rainer Rudolph, me të cilin ka diskutuar për zhvillimet e fundit politike dhe bashkëpunimin dypalësh.
Gjatë takimit u theksua partneriteti i fortë dhe strategjik ndërmjet Kosovës dhe Gjermanisë, si dhe rëndësia e vazhdimit të këtij bashkëpunimi në fusha të ndryshme.
Presidentja Osmani vlerësoi marrëdhëniet e shkëlqyera ndërmjet dy vendeve dhe shprehu mirënjohjen e thellë për mbështetjen e vazhdueshme që Gjermania i ka dhënë Kosovës në proceset kyçe të shtetndërtimit, zhvillimit demokratik dhe fuqizimit të subjektivitetit ndërkombëtar.
Ajo gjithashtu falënderoi ambasadorin Rudolph për angazhimin dhe kontributin e tij personal gjatë mandatit në forcimin e lidhjeve mes dy shteteve.
Në përfundim, Osmani rikonfirmoi përkushtimin e institucioneve të Kosovës për thellimin e mëtejmë të aleancës strategjike me Gjermaninë, duke e cilësuar këtë partneritet si jetik për të ardhmen evropiane të vendit.
