Ka nisur numërimi i votave për referendumin për drejtësinë në Itali, ndërsa rezultatet e para tregojnë një epërsi të kampit kundërshtues të ndryshimeve kushtetuese.
Sipas të dhënave fillestare të publikuara nga mediat italiane dhe projeksioneve të realizuara nga institucionet si Opinio/Rai, Sëg/La7 dhe Youtrend/Sky, rreth 54.5% e votuesve janë shprehur kundër reformës (“Jo”), ndërsa 45.5% kanë votuar në favor (“Po”). Edhe sondazhet paraprake pas votimit japin një panoramë të ngjashme, me rreth 53.9% “Jo” dhe 46.1% “Po”.
Pjesëmarrja në votime raportohet të ketë arritur në 58.9% të elektoratit, një tregues i interesimit të lartë të qytetarëve për këtë proces të rëndësishëm.
Qendrat e votimit u hapën të dielën nga ora 07:00 deri në 23:00 dhe vijuan të hënën nga ora 07:00 deri në 15:00, kur edhe u mbyllën përfundimisht. Menjëherë pas kësaj, nisi procesi i numërimit, i cili po zhvillohet me ritëm të shpejtë. Deri në orën 15:40, janë numëruar rreth 6,400 qendra votimi, që përbëjnë afërsisht 10% të totalit.
Referendumi ka në qendër një ndryshim të rëndësishëm në sistemin e drejtësisë: ndarjen e karrierave mes gjyqtarëve dhe prokurorëve. Aktualisht, këto dy role ndjekin të njëjtën rrugë profesionale dhe lejojnë kalime të kufizuara nga njëri funksion në tjetrin. Nëse reforma do të miratohej, këto karriera do të ndaheshin plotësisht, duke detyruar profesionistët e drejtësisë të zgjedhin që në fillim nëse do të jenë gjyqtarë apo prokurorë, pa mundësi ndryshimi në të ardhmen.
Rezultatet përfundimtare pritet të certifikohen nga Ministria e Brendshme e Italisë në vijim të procesit të plotë të numërimit.
