Misioni Fatkmbledhës i Platformës së Këshillit të Evropës për Sigurinë e Gazetarëve ka mbajtur konferencë për media ku edhe ka shpalosur të gjeturat e punëtorisë dyditore me përfaqësues të mediave ku sipas tyre liria e mediave është më keq se sa viteve të kaluara,
Juristja e mediave, Flutura Kusari ka theksuar se janë takuar me kryeministrin e Kosovës, Albin Kurti dhe se zyra e këtij të fundit ka shprehur vullnet për bashkëpunim sa i përket ligjit për Komisionin e Pavarur të Mediave.
“E gjetura jonë kryesore, siç u përmend, është që pas misionit që kishim pak a shumë në vitin 2022 e deri më tani, ka rënie të lirisë së medias në Kosovë, pra ka përkeqësim të situatës. Dhe arsyet kryesore janë të shumta, mirëpo ne jemi fokusuar në këto dy ditë të misionit në tre aspekte, të cilat besojmë që kanë ndikuar që situata të përkeqësohet.
E para ka të bëjë me ligjin jo kushtetues për Komisionin e Pavarur për Media; e dyta ka të bëjë me presionin politik në Radio Televizionin e Kosovës dhe problemet me financimin e televizionit publik; dhe e treta ka të bëjë me sulmet verbale. Shkurtimisht po fokusohem te aspekti ligjor edhe te aspekti që lidhet me punën e prokurorisë dhe të gjykatave.
Në deklaratën tonë do të gjeni më shumë detaje, por ajo çfarë ne shpresojmë, nëse duam të jemi pak më konstruktivë në kuptim me kqyr përpara, është që shpresojmë shumë që ligji për KPM-në, i cili është në agjendën legjislative, do të draftohet në konsultim dhe me përfshirje të të gjitha grupeve të interesit, me fokus të veçantë të shoqërisë civile dhe të mediave dhe gazetarëve.
Pas takimit me Kryeministrin, ne patëm edhe një takim ashtu të shkurtër kalimthi me stafin e zyrës së Kryeministrit, të cilët për mua ishin shumë e shumë konstruktivë dhe na lanë derën hapur me bashkëpunua me ta, dhe shprehën vullnetin që sidomos sa i përket ligjit për Komisionin e Pavarur për Media si ligjin më thelbësor, do të ketë një procedurë tjetër krahasim me atë që kishim para tri viteve, e që i bie me përfshirje gjithëpërfshirëse të të gjithë akterëve. Shpresoj që ajo çfarë u diskutua do të ndodhë edhe në realitet. Nga ana jonë ne i shprehëm interesimin tonë që do të bashkëpunojmë, të ofrojmë ekspertizë edhe bashkë të punojmë në draftim”, tha Kusari
Ricardo Gutierrez nga Federata e Gazetarëve Evropiane tha se situata është shumë keq dhe se qasja e kryeministrit Kurti ndaj mediave është shqetësuese.
Ai, tha se nga kryeministri Kurti kanë kërkuar që t’i dënoj deklaratat publike kundër gazetarëve, por se ky i fundit nuk ka pranuar.
“Ne u takuam me Kryeministrin dje për gati dy orë, Kryeministrin dhe disa nga zyrtarët e zyrës së tij. Dhe nga këndvështrimi im, përfundimi më shqetësues nga ky takim është fakti që Kryeministri nuk po e njeh këtë klimë armiqësore; përkundrazi, ai po e justifikon atë. Kryeministrit Albin Kurti iu kërkua të dënonte deklaratat publike kundër gazetarëve, mirëpo ai nuk pranoi.
“E dini, ‘nëse gazetarët sulmohen, mbase kjo ndodhë sepse ndonjëherë edhe politikanët sulmohen’. Pra, është si të justifikosh këtë lloj gjëje dhe ai refuzoi qartë të dënonte, sepse ne i kërkuam atij, i kërkuam të dënonte çdo deklaratë publike kundër gazetarëve. Ai refuzoi ta bënte këtë dhe nga këndvështrimi im, ky është një nga përfundimet më shqetësuese të këtij takimi. Pse e them këtë? Sepse unë e shoh këtë si një mungesë totale të vullnetit politik për të përmirësuar situatën. Ne e pyetëm disa herë për propozimet e tij për të përmirësuar situatën asgjë nuk erdhi nga ana e tij, pavarësisht deklaratës zyrtare që ai publikoi pas takimit duke thënë se ishte gati të bashkëpunonte me ne dhe të konsideronte propozimet. Unë mund t’ju them se gjatë takimit nuk pati asnjë propozim për të përmirësuar situatën.”, tha Gutierrez.
James Wiseman nga Instituti Ndërkombëtar i Shtypit rekomandoi që Qeveria të nis një dialog me shoqatat e gazetarëve.
Wiseman, tha se janë të shqetësuar për drejtimin që po merr liria e medias në Kosovë.
” Ky është misioni im i dytë këtu në Kosovë brenda pak më shumë se dy viteve. Siç e dëgjuat nga kolegët e mi, ne jemi vërtet të shqetësuar për drejtimin që po merr liria e medias në Kosovë. Ajo që na ka goditur më shumë gjatë këtyre dy ditëve është niveli i mosbesimit dhe polarizimit midis qeverisë dhe komunitetit të mediave.
Gjatë takimit tonë me Kryeministrin dje, ne vumë re një mungesë gatishmërie për të pranuar shqetësimet legjitime që gazetarët kanë për sigurinë e tyre dhe për mjedisin rregullator. Në vend që të angazhohej me substancën e kritikave tona, ne pamë një tendencë për t’i hedhur poshtë ato si të motivuara politikisht.
Si një rrjet që monitoron lirinë e shtypit globalisht, ne e dimë se kur dialogu midis autoriteteve dhe medias ndërpritet, kjo krijon një vakum që shpesh mbushet me armiqësi dhe vetëcensurë. Ne i bëjmë thirrje qeverisë që të rinisë një dialog kuptimplotë me shoqatat e gazetarëve dhe të sigurohet që çdo ligj i ri, veçanërisht ai për KPM-në, të jetë në përputhje me standardet më të larta evropiane.
Ne do të vazhdojmë ta monitorojmë situatën nga afër dhe raporti ynë i plotë do të detajojë rekomandimet tona specifike për të ndryshuar këtë trajektore negative”, tha Wiseman
