Policia franceze ndaloi një sulm me bombë jashtë degës së Bankës së Amerikës të shtunën në mëngjes. Autoritetet njoftojnë, se kanë vënë në pranga, një burrë, i cili ishte gati të aktivizonte një pajisje shpërthyese.
Incidenti ndodhi rreth orës 3:30 të mëngjesit përpara një ndërtese të Bankës së Amerikës në arondissementin elegant të 8-të, disa rrugë larg Champs-Elysees. Policia e kapi burrin menjëherë pasi ai vendosi një pajisje, të bërë nga pesë litra lëng që besohet të jetë karburant dhe një sistem ndezjeje.
Zyra e prokurorit kundër terrorizmit në Francë i tha AFP-së të shtunën se ka marrë përsipër hetimin. Zyra konfirmoi se një i dyshuar i kapur në flagrancë ishte në paraburgim dhe tha se po hetonte “tentativën e dëmtimit me zjarr ose mjete të tjera të rrezikshme në lidhje me një sipërmarrje terroriste” dhe një “komplot kriminal terrorist”.
Si policia gjyqësore e Parisit ashtu edhe shërbimi i inteligjencës së brendshme të Francës, Drejtoria e Përgjithshme për Sigurinë e Brendshme (DGSI), janë të përfshirë në hetim.
