Nait Hasani ka reaguar ashpër ndaj ekspozitës të hapur në sheshin e Prishtinës, e cila trajton krimet e luftës në Kosovë, duke e cilësuar përmbajtjen e saj si të pasaktë dhe të mbushur me “rrena serbe”.
Në një reagim publik në rrjetin social Facebook, Hasani theksoi se ekspozita deformon të vërtetën rreth Masakrës në Burgun e Dubravës, një nga ngjarjet më të rënda gjatë luftës në Kosovë. Ai e lidhi reagimin e tij edhe me përvjetorin e lirimit nga burgjet serbe, duke kujtuar vuajtjet dhe krimet e kryera ndaj të burgosurve shqiptarë.
Sipas Hasanit, në ekspozitë nuk pasqyrohet realiteti i asaj që ndodhi në Dubravë, ku ai pretendon se janë vrarë 118 të burgosur shqiptarë dhe janë plagosur mbi 400 të tjerë. Ai theksoi se viktimat nuk ishin të armatosura, por të burgosur shqiptarë, përfshirë edhe të moshuar dhe të mitur.
“Aty nuk tregohet e vërteta, por rrena dhe mashtrime që i shërbejnë narrativave serbe”, u shpreh Hasani, duke shtuar se paraqitja e tillë e ngjarjes është fyese për viktimat dhe familjarët e tyre.
Ai kritikoi gjithashtu faktin që ekspozita është financuar nga Kuvendi i Kosovës, duke e cilësuar këtë si të papranueshme dhe në kundërshtim me qëndrimet zyrtare të institucioneve vendore për këtë masakër.
Në fund, Hasani kërkoi nga institucionet e drejtësisë që të ndërmarrin masa ndaj autorit të ekspozitës, duke kërkuar hetim dhe dënim për atë që e quajti “krim të qëllimshëm dhe monstruoz” ndaj së vërtetës historike dhe kujtimit të viktimave.
