Donald Trump ka sulmuar sërish NATO-n për mosmbështetjen e SHBA-së në luftën me Iranin, pas një takimi privat me Sekretarin e Përgjithshëm të saj, Mark Rutte, në Shtëpinë e Bardhë.
Në një postim në Truth Social pas takimit, presidenti amerikan tha: “NATO NUK ISHTE ATY KUR NE KISHIM NEVOJË PËR TA, DHE NUK DO TË JETË ATY NËSE DO TË NA DUHET SËRISH.”
Ndërkohë, Rutte e përshkroi takimin e tij me Trump për CNN si “shumë të drejtpërdrejtë” dhe “shumë të hapur”, pavarësisht mospajtimeve të qarta, raporton BBC, përcjell Express.
Para bisedimeve të së mërkurës, Trump kishte lënë të kuptohej mundësia e largimit nga aleanca ushtarake transatlantike, pasi disa vende të NATO-s kundërshtuan thirrjet e tij për të ndihmuar në rihapjen e Ngushticës së Hormuzit, për të lehtësuar rritjen e çmimeve globale të naftës.
Shtëpia e Bardhë nuk dha detaje mbi bisedën.
Sekretari i Përgjithshëm qëndroi në Shtëpinë e Bardhë për më shumë se dy orë të mërkurën, megjithëse nuk dihet sa zgjati takimi me Trump.
Takimi pritej të kishte për qëllim bindjen e Trump se është në interesin e tij dhe të SHBA-së që të mbetet në aleancën e NATO-s.
Megjithatë, ajo që është e qartë është se Trump vazhdon të ketë rezerva të thella ndaj aleancës dhe vendeve anëtare, për të cilat ai beson se nuk e kanë ndihmuar mjaftueshëm SHBA-në para dhe gjatë operacionit “Epic Fury”.
Në javët e fundit, Trump ka kërcënuar të tërhiqet nga aleanca transatlantike me 32 anëtarë.
I pyetur për rolin e NATO-s në konfliktin në vazhdim me Iranin, zëdhënësja e Shtëpisë së Bardhë, Karoline Leavitt, tha të mërkurën, duke cituar drejtpërdrejt presidentin, se NATO “u testua dhe dështoi”.
Leavitt tha se vendet e NATO-s “u kthyen shpinën qytetarëve amerikanë”, të cilët financojnë mbrojtjen e tyre, dhe se Trump do të zhvillonte një “bisedë shumë të drejtpërdrejtë dhe të hapur” me kreun e NATO-s.
Ndërkohë, një pjesë e madhe e mesazhit të Rutte për Trump duket të ketë qenë se shumë vende evropiane nuk kanë penguar përpjekjet.
Sekretari i Përgjithshëm i tha CNN se ai theksoi që “shumica dërrmuese e vendeve evropiane kanë ndihmuar me bazat, logjistikën dhe fluturimet mbi territor”.
“Prandaj është një tablo me nuanca,” tha Rutte.
Mbetet për t’u parë nëse ky argument – dhe marrëdhënia e ngrohtë personale e Sekretarit të Përgjithshëm me Trump – do të mjaftojnë për presidentin amerikan.
I pyetur nëse bota është më e sigurt tani sesa para luftës, Rutte u përgjigj “absolutisht” dhe ia atribuoi këtë “udhëheqjes” së Trump në dobësimin e kërcënimeve bërthamore të Iranit.
Ai shtoi se anëtarët e NATO-s nuk e shohin luftën në Iran si të paligjshme dhe se shumica ranë dakord se ishte e rëndësishme të dobësoheshin kapacitetet bërthamore të Iranit.
Në fund të vitit 2023, Kongresi i SHBA-së votoi për të ndaluar çdo president amerikan që të tërhiqet në mënyrë të njëanshme nga NATO pa miratimin e dy të tretave të Senatit ose një akti të Kongresit.
Marrëdhënia mes administratës dhe aleancës së NATO-s ishte tashmë e tensionuar edhe para luftës me Iranin, kryesisht për shkak të mosmarrëveshjeve mbi planet e Trump për Grenlandën.
Trump përfshiu frustrimet e tij për Grenlandën në postimin e tij në Truth Social pas takimit me Rutte, duke thënë: “MBANI MEND GRENLANDËN, ATË COPË TË MADHE AKULLI, TË KEQMENAXHUAR!!!”
Megjithatë, konflikti në Iran i ka çuar pakënaqësitë e Trump ndaj NATO-s në nivele të reja dhe ka krijuar ndoshta sfidën më të madhe që aleanca ka përballuar ndonjëherë në historinë e saj.
