Një bazë me armë zjarri dhe municion luftarak është zbuluar në Manzë të Durrësit, ndërsa një 20-vjeçar është arrestuar në flagrancë, pasi dyshohet se arsenalit i shërbente për furnizimin e grupeve kriminale.
Gjatë kontrollit në banesën e të riut, policia gjeti dhe sekuestroi si prova materiale 4 pistoleta, një armë automatike model 56 (kallashnikov), një armë gjahu (shotgun), 6 krehëra, qindra fishekë luftarakë të kalibrave të ndryshëm, një targë automjeti italiane dhe një aparat celular.
Sipas policisë, armët do t’i nënshtrohen ekspertizës në Institutin e Policisë Shkencore për të verifikuar nëse janë përdorur në ngjarje kriminale të mëparshme.
Hetimet vijojnë për identifikimin e personave të tjerë që mund të jenë të përfshirë në këtë veprimtari kriminale.
