Moti i keq ka goditur zonën metropolitane të Denverit në SHBA, ku reshjet e dendura të shiut dhe breshëri shkaktuan përmbytje të rrugëve, bllokuan automjete dhe detyruan ekipet e emergjencës të ndërhynin për shpëtimin e disa personave.
Stuhitë goditën pasditen e së shtunës qarqet Douglas dhe Arapahoe, ku në disa zona breshëri arriti në një trashësi deri në rreth 90 centimetra. Për pastrimin dhe hapjen e rrugëve u përdorën edhe mjete borëpastruese.
Sipas autoriteteve lokale, përmbytjet e menjëhershme i bënë disa akse të pakalueshme, ndërsa ekipet e emergjencës kryen afro një duzinë operacionesh për shpëtimin e personave të bllokuar në automjete.
South Metro Fire Rescue ndërhyri gjithashtu në dy raste në Chatfield State Park, ku katër persona dhe një qen, të cilët ndodheshin mbi dërrasa paddleboard, u gjendën në vështirësi pasi era u forcua.
Autoritetet u bënë thirrje banorëve të tregojnë kujdes gjatë motit të keq dhe të mos tentojnë të kalojnë me automjete në rrugët e përmbytura, pasi niveli dhe shpejtësia e ujit mund të jenë më të mëdha nga sa duken
