Ndotja në lumin Senë ka bërë që organizatorët e Lojërave Olimpike të anulojnë për të dytën ditë me radhë stërvitjet e garës së Triathlonit.
Pas reshjeve të fundjavës, uji arriti nivele të larta të ndotjes, duke ngritur alarmin për zhvillimin normal të garës. Gjithsesi, organizatorët e Olimpiadës shfaqën besim se eventi do të zhvillohet të martën dhe të mërkurën.
“Po monitorojmë motin për ditët në vazhdim. Priten disa reshje dhe më pas do të dalë dielli, pra deri të premten gjithçka do të jetë në rregull për garën e Triathlonit. Ekipii organizatorëve ka besim se do të jemi në gjendje të zhvillojmë garat e notit në lumin Senë”, u shpreh Tony Estanguet, president i komitetit organizator të “Paris 2024”.
Të dhënat e publikuara nga autoritetet konfirmuan prezencën në nivele të larta të bakterit Esheria Koli, në urën Aleksandri i Tretë, aty ku sportistët do të hyjnë në ujë.
“Kemi shanse të mirata zhvillojmë garën e Triathlonit sipas planit. Shpresojmë që eventi të mosshtyhet, apo që pjesa e garës së notit të mos hiqet. Do të jemi gati për çdo situatë. Sportistët e kësaj disipline janë fleksibël dhe dinë të përshtaten”, theksoi Scott Schnitzspahn, trajner i ekipit të SHBA në Triathlon.
Autoritetet në Paris po punojnë që lumi Senë të pastrohet dhe sportistët të garojnë aty, si ka ndodhur në Olimpiadën e vitit 1900. Në të kundërt, konkurrimi mund të realizohet në vendin ku do të zhvillohen garat e kanotazhit dhe Triathlonit të kthehet në Duathlon.
