Lando Norris me McLaren siguroi sot “pole position” në pistën qytetase të Marina Bay, të vlefshme për garën e Çmimit të Madh të Singaporit në Formula 1. Piloti britanik dha kohën 1’29”525, duke qenë më i shpejti në pistë.
Rikthehet protagonist piloti holandez Max Verstappen, në vendin e dytë me Red Bull Racing dhe do ta nisë garën nga vija e parë pas shumë kohësh. Në vendin e tretë u klasifikua një tjetër britanik, Lewis Hamilton me Mercedes.
Ky është “pole” numër 8 në karrierë për Norris, që konfirmon pretendimet e tij për të zbritur nga froni Verstappen, që sot luftoi fort për vendin e parë.
Në vendin e katërt u klasifikua George Russell me Mercedes, që la pas Oscar Piastri me McLaren.
Dobët u paraqit Ferrari, në vendet 9-10 me dy pilotët e saj, Charles Leclerc e Carlos Sainz.
Monogaskut iu hoq koha, ndërsa spanjolli ishte protagonist i një aksidenti në sesionin e tretë të provave zyrtare që u zhvilluan sot.
Në “top-10” më të mirët u renditën edhe Nico Hulkenberg (i gjashti), Fernando Alonso (i shtati) dhe Yuki Tsunoda (i teti), ndërkohë që zhgënjeu meksikani Sergio Perez me makinën tjetër Red Bull, që u klasifikua i 13-ti.
