Tensionet janë të larta në Lindjen e Mesme, pasi Izraeli goditi tri baza të misionit Unifil të vendosura në Libanin jugor. Dy nga bazat e prekura janë italiane, ndërsa e treta është selia e misionit të OKB-së.
Shefi i paqeruajtësve të OKB-së, Jean-Pierre Lacroix i ka thënë këshillit të sigurisë se siguria e më shumë se 10,400 paqeruajtësve të OKB-së në Liban ishte “gjithnjë e më shumë në rrezik” dhe operacionet praktikisht ishin ndalur që nga fundi i shtatorit, duke përkuar me përshkallëzimin e Izraelit kundër Hezbollahut në Liban.
“Paqeruajtësit kanë qenë të kufizuar në bazat e tyre me periudha të konsiderueshme kohore në strehë,” tha ai, duke shtuar se misioni – i njohur si Unifil – ishte i gatshëm të mbështeste të gjitha përpjekjet drejt një zgjidhjeje diplomatike.
Komentet e tij erdhën pasi misioni paqeruajtës i OKB-së në Liban tha se forcat izraelite kishin qëlluar qëllimisht mbi pozicionet e tij, duke plagosur dy paqeruajtës nga Indonezia. Unifil i quajti sulmet ndaj paqeruajtësve “një shkelje të rëndë të ligjit ndërkombëtar humanitar”.
Shtëpia e Bardhë tha se SHBA ishte thellësisht e shqetësuar nga këto raporte dhe po i bënte presion Izraelit për detaje. Ushtria izraelite tha se trupat e saj operonin në zonën Naqoura, “pranë një baze Unifil”.
“Prandaj, IDF udhëzoi forcat e OKB-së në zonë që të qëndronin në hapësira të mbrojtura, pas së cilës forcat hapën zjarr në zonë”, thuhet në deklaratën e Izraelit, duke shtuar se ruan komunikimin rutinë me Unifil.
Paqeruajtësit ishin të vendosur të qëndronin në postet e tyre pavarësisht sulmeve izraelite dhe urdhrave të ushtrisë izraelite për t’u larguar, tha zëdhënësi i forcës së OKB-së, Andrea Tenenti. 50 vendet kontribuuese të saj kishin rënë dakord të enjten të vazhdonin vendosjen e më shumë se 10,000 paqeruajtësve midis lumit Litani në veri dhe kufirit të njohur nga OKB midis Libanit dhe Izraelit të njohur si Linja Blu në jug.
“Ne jemi atje sepse Këshilli i Sigurisë na ka kërkuar që të jemi atje. Kështu që ne do të qëndrojmë derisa situata të bëhet e pamundur për të vepruar”, tha Tenenti.
Në Nju Jork, ambasadori i Izraelit në OKB, Danny Danon, tha se Izraeli rekomandoi që Unifil të zhvendosej 5 km në veri “për të shmangur rrezikun ndërsa luftimet intensifikohen”.
Sulmet e ushtrisë izraelite ndaj njësive paqeruajtëse të OKB-së në Libanin jugperëndimor janë “në shkelje të ligjeve të luftës” dhe OKB-ja “duhet të krijojë urgjentisht dhe vendet anëtare të OKB-së duhet të mbështesin një hetim ndërkombëtar për armiqësitë në Liban dhe Izrael me mandat për të denoncuar publikisht shkeljet”, deklaroi Human Rights Watch (HRW) në një raport.
Edhe Presidenti i Këshillit Evropian Charles Michel dënoi sulmet ndaj operacioneve paqeruajtëse të OKB-së.
“Një sulm kundër një misioni paqeruajtës të Kombeve të Bashkuara është i papërgjegjshëm dhe i papranueshëm, dhe kjo është arsyeja pse ne i bëjmë thirrje Izraelit dhe të gjitha palëve që të respektojnë plotësisht ligjin ndërkombëtar humanitar,” tha Michel në margjinat e samitit të Shoqatës së Kombeve të Azisë Juglindore në Laos.
