Mbrojtësi i Kombëtares shqiptare, Marash Kumbulla, ka rrëfyer për kalimin e tij nga Italia në Spanjë, nga Roma te Espanjoli.
Në një intervistë me “Corriere dello Sport”, Kumbulla arsyetoi ngjitjen e tij të shpejtë në radhët e klubit spanjoll, duke qenë titullar i padiskutuar, pozitë kjo që nuk e kishte te Roma.
“Ne jemi vetëm në fillim të sezonit. Unë patjetër ndihem mirë dhe po luaj mirë. Po gjej qëndrueshmëri, e cila është gjëja më e rëndësishme për një futbollist. Shpresoj të vazhdoj kështu. Huazimi te Sasuolon? Mendoj se ka një shpjegim të thjeshtë. Jam një lojtar që duhet të jem mirë fizikisht. Shumë prej kolegëve të mi iu deshën disa muaj për t’u rikthyer në nivele të larta kur ata këputën ligamentin. Fatkeqësisht në gjashtë muajt me Sasuolon, po lija pas dëmtimin dhe nuk isha në gjendje të shprehesha sa më mirë në fushë. Isha i zhgënjyer me veten time”, u shpreh si fillim mbrojtësi i Kombëtares shqiptare.
24-vjeçari u ndal dhe te huazimi i tij te Espanjol, duke treguar se përse mori këtë vendim.
“Espanyol? Më kërkuan, si trajnerin ashtu edhe drejtuesit dhe më bënë të ndihem i rëndësishëm. Askush nuk mund t’ju garantojë një pozicion të përhershëm, por ndjeva se klubi kishte besim tek unë. Dhe ishte e vërtetë. Më ndihmoi edhe fakti që arrita në gjendje të mirë fizike, sepse kisha bërë një fazë përgatitore të mirë me Romën në verë.
“Jeta në Barcelonë? E bukur. U ambientova menjëherë. Unë jetoj në një apartament në qendër, bëj pazar, fansat janë të pasionuar, por jo ndërhyrës në jetën private. Qyteti, i cili është i bukur, i përshtatet shumë karakterit tim. Nuk më pëlqen të shfaqem shumë publikisht. Në Romë është pothuajse e pamundur të mos biesh në sy. Nuk po them që është një gjë e keqe, por një futbollist e vlerëson qetësinë private”, nënvizoi ai.
E ardhmja duket e lumtur në La Liga
Mbrojtësi kuqezi, Marash Kumbulla, gjithashtu u ndal dhe te e ardhmja e tij, i cili u shpreh se për momentin nuk po mendon aspak për të dhe se është vetëm i fokusuar te Espanjoli dhe te Kombëtarja shqiptare.
“Fakti është se nuk e mendoj. Unë jam këtu dhe dua të kontribuoj për të ndihmuar Espanjol të mbijetojë në La Liga. Unë kam edhe Kombëtaren shqiptare për të menduar. Në fund të sezonit do të shohim se çfarë është më e mira për të bërë”, nënvizoi ai.
Në fund, Kumbulla u ndal dhe te periudha e tij te Roma, aty ku u kritikua jo pak nga tifozët verdhekuq.
“Kritikat e tifozëve të Romës? Ndoshta thjesht nuk më mbajnë mend si futbollist. Është pak e bezdisshme të pranosh kritika të ashpra. Siç e thashë edhe më parë, në Itali për një vit e gjysmë nuk e shpreha mirë potencialin tim. Por kam mjaftueshëm vetëbesim për të ecur përpara. Nëse ngecni në një gabim, nuk mund ta bëni këtë punë. E dija që herët a vonë do të kthehesha”, shtoi Kumbulla.
Në fund nuk mungon komenti i tij edhe për momentet e bukura me Romën në Ligën e Europës.
“Momenti më i mirë ishte goli ndaj Real Sociedad, në Europa League. Më e keqja ishte kartoni i kuq kundër Sasuolos. Ajo goditje ndaj Berardit ishte një gjest instinktiv për të cilin u pendova menjëherë. Fatkeqësisht, ishte tepër vonë për t’u kthyer dhe ai episod na kushtoi ndeshjen”, përfundoi 24-vjeçari shqiptar.
