Manchester City kanë organizuar një takim “urgjent” me Pep Guardiolën, sipas raporteve, pas serisë më të keqe të rezultateve në gjashtë vitet e fundit. Për herë të parë në karrierën e tij si trajner, Guardiola ka humbur katër ndeshje radhazi, pas disfatës 2-1 ndaj Brighton të shtunën në mbrëmje në Amex Stadium.
Erling Haaland e kaloi City-n në avantazh në pjesën e parë, por Brighton përmbysi rezultatin me gola nga Joao Pedro dhe Matt O’Riley, duke i shkaktuar një tjetër humbje në transfertë. Aktualisht, City është pesë pikë prapa Liverpool-it, që kryeson tabelën pasi mposhti Aston Villan në Anfield. Pushimi ndërkombëtar vjen në kohën e duhur, duke pasur parasysh listën e gjatë të dëmtimeve të ekipit.
Sipas Matteo Moretto të Relevo, Manchester City po mban një takim me Pep Guardiolën, por fokusi kryesor do të jetë diskutimi mbi mundësinë e rinovimit të kontratës për trajnerin katalanas. Raporti tregon se, pavarësisht spekulimeve për ofertën nga kombëtarja e Brazilit, City është i vendosur ta mbajë Guardiolën dhe dëshiron që ai të zgjasë kontratën edhe për një vit tjetër, gjë që do t’i lejonte të plotësonte një dekadë në Etihad Stadium.
Kontrata aktuale e Guardiolës skadon në fund të sezonit 2024/25. Para se Thomas Tuchel të emërohej trajner i Anglisë, Guardiola ishte lidhur gjithashtu me këtë pozicion. Megjithatë, sipas një raporti nga David Ornstein i The Athletic, është më e mundshme që Guardiola të zgjasë qëndrimin e tij te City edhe për një vit tjetër, pavarësisht vendimit të pritur mbi akuzat e tyre në Premier League
Edhe pse City po kalon një periudhë të dobët, Guardiola e pëlqen sfidën dhe ka motivimin për të përmbysur situatën.
“Njerëzit zakonisht humbin ndeshje,” tha Guardiola, sipas The Athletic.
“Gjithmonë ka një herë të parë në jetë. Kjo është sfida ime, sfida jonë. Më pëlqen ta përballoj atë. Nuk do të tërhiqem aspak, më pak se kurrë. Më shumë se kurrë dua ta bëj dhe do të përpiqemi sërish.”
